05.12.2016 |
БАСПАСӨЗ РЕЛИЗІ
Қазақстан Республикасы Орталық сайлау комиссиясының Төрағасы Б. Имашев 2016 жылғы 4 желтоқсанда болған Өзбекстан Республикасы Президентінің сайлауын байқауға қатысты
Қазақстан Республикасы Орталық сайлау комиссиясының Төрағасы Б. Имашев Өзбекстан Республикасы Орталық сайлау комиссиясының Төрағасы М. Абдусаломовтың шақыруы бойынша 2016 жылғы 4 желтоқсанда болған Өзбекстан Республикасы Президентінің сайлауын байқауға қатысты.
Іссапар шеңберінде 3 желтоқсанда Ортсайлауком Басшысы округтік және учаскелік сайлау комиссияларының сайлауды өткізуге дайындығын зерделеу мақсатында Самарқанд облысының округтік сайлау комиссиясының төрағасы Ф. Тошевпен кездесті, сондай-ақ сайлау күніне дайындық жөніндегі жұмыспен танысу үшін Самарқанд қаласындағы сайлау учаскелерін аралады.
Дауыс беру күні 4 желтоқсанда Б. Имашев Ташкент қаласындағы бірқатар сайлау учаскелерін аралады. Сол күні оның Өзбекстан Ортсайлаукомының Басшысы М. Абдусаломовпен кездесуі болды, кездесуде сайлауды ұйымдастыру, кандидаттардың, саяси партиялардың, БАҚ-тың, жергілікті және халықаралық байқаушылардың және басқа сайлау процесіне қатысушылар қызметінің мәселелері талқыланды. Қазақстан Ортсайлаукомының Төрағасы аралаған сайлау учаскелерінен сайлаушылардың жоғары белсенділігін, учаскелік сайлау комиссиялары мүшелерінің нақты және үйлесімді жұмысын атап өтті. Халықаралық ұйымдардың көптеген миссияларының, шет мемлекеттер байқаушыларының сайлауды байқауға қатысуы халықаралық қоғамдастық тарапынан үлкен қызығушылықты білдіреді. Тараптар екі елдің орталық сайлау органдары арасындағы ынтымақтастықты тереңдету, оны дамудың жаңа деңгейіне шығару туралы уағдаласты.
Сайлау учаскелері жабылғаннан кейін Қазақстан Ортсайлаукомының Басшысы Тәуелсіз Мемлекеттер Достастығынан (ТМД) байқаушылар Миссиясының мәлімдемесін талқылауға қатысты.
Сондай-ақ, Қазақстан Орсайлаукомынан Шанхай ынтымақтастық ұйымынан (ШЫҰ) байқаушылар Миссиясының құрамында Ортсайлауком мүшесі М. Сәрсембаев сайлауды байқауға қатысты.
Қазақстаннан барлығы Өзбекстандағы президенттік сайлауға халықаралық байқаушылар ретінде 59 адам, соның ішінде ТМД Миссиясының құрамында – 8, ЕҚЫҰ Демократиялық институттар және адам құқықтары жөніндегі бюросының құрамында - 10, ШЫҰ – 1, екі жақты негізде 40 адам қатысты.