25.05.2017 |
БАСПАСӨЗ РЕЛИЗІ
2017 жылғы 24-25 мамырда Варшава қаласында ҚР ОСК мүшесі М.А. Сәрсембаев ЕҚЫҰ/ДИАҚБ Сайлау департаменті басшылығымен кездесті
2017 жылғы 24-25 мамырда Варшавада Қазақстан Республикасы Орталық сайлау комиссиясының мүшесі М.А. Сәрсембаев пен Орталық сайлау комиссиясы жанындағы Сарапшылық-әдістемелік кеңестің мүшесі, Еуропалық құқық және адам құқықтары институтының директоры М.С. Башимов ЕҚЫҰ/ ДИАҚБ Сайлау департаменті директорының орынбасары Р. Лаппинмен және сайлау жөніндегі кеңесші Р. Груичьпен кездесті.
Варшаваға бару сапарының мақсаты ЕҚЫҰ/ДИАҚБ Миссиясының 2016 жылғы 20 наурызда Қазақстан Республикасында өткен парламенттік сайлауды байқау жөніндегі Қорытынды есебінің ұсынымдарын талқылау және сыни ескертулер мен ұсынымдар бойынша сындарлы диалог орнату болды.
Кездесуде Миссияның сайлауды әкімшіліктендіру, сайлау комиссияларының құрамындағы саяси партиялардың тең өкілдік ету кепілдіктері бөлігінде, сайлаушыларды тіркеу, сайлау алдындағы науқанды қаржыландыру, сайлау күнінің рәсімдерін сақтау мәселелері бойынша берген ескертулері мен ұсынымдары жан-жақты талқыланды.
М. Сәрсембаев Сайлау туралы конституциялық заңның саяси партиялардың тең өкілдік ету кепілдіктерін қамтитынын атап көрсетті. Сонымен қатар сайлау комиссияларының құрамында өкілі жоқ саяси партиялар сайлау науқанын даярлау және өткізу кезеңіне кеңесші дауыс құқығын бере отырып өз өкілін және Сайлау туралы заңнамада белгіленген тәртіппен тіркелген байқаушылар мен сенім білдірген адамдарын тиісті сайлау комиссиясына жіберуге құқылы. Сайлаушыларды тіркеу мәселесі бойынша сайлаушылардың электрондық тізілімінде деректерді түзету және тікелей алмасу, соттың шешімі бойынша жазасын өтеп жатқан, сондай-ақ сот іс-әрекетке қабілетсіз деп таныған адамдардың сайлау құқықтарын шектеу, сайлауға бірнеше күн қалғанда сайлаушылардың соңғы тізімдерін сайлау учаскелеріне жіберу, сайлау күні сайлаушылардың тіркелуін болдырмау үшін әр түрлі мемлекеттік органдардың арасында ақпарат алмасудың орталықтандырылған жүйесі туралы айтылды.
Тараптар Қорытынды есептің сайлау күні бойынша ұсынымдарын да талқылады: дауыс беру, дауыстарды санау және қорытынды шығару процесінде елеулі бұзушылықтарды болдырмау үшін тиімді шараларды қабылдау, Ортсайлаукомның ресми ресурсында аудандар мен сайлау учаскелері бойынша сайлау қорытындыларын жариялау.