26.10.2016 |
БАСПАСӨЗ РЕЛИЗІ
Мәслихаттардың шығып қалған депутаттарының орнына сайлауда
дауыс беру күніне дайындық туралы
2016 жылғы 28 қазанда 24.00 сағатта мәслихаттардың шығып қалған депутаттығына кандидаттардың сайлауалды үгіті аяқталады. Дауыс беру күні (30 қазан) және оның алдындағы күні (29 қазан) үгітке тыйым салынады.
Мониторинг деректеріне сәйкес кандидаттардың үгіт жұмысы негізінен сайлауалды үгіттік плакаттар мен листовкаларды әзірлеу мен тарату нысанында, сондай-ақ өңірлік баспа бұқаралық ақпарат құралдарында бағдарламалық мақалалар жариялау арқылы жүргізіледі.
Сондай-ақ сайлаушылармен кездесулер ұйымдастыру белсенді өткізілуде. Көптеген кандидаттар жергілікті радио мен телеарналарда өз сайлауалды бағдарламалары бойынша сөз сөйлеуге бюджеттен бөлінген қаражатты пайдаланды.
Ағымдағы сайлауды ұйымдастыру мен өткізуге барлығы 223 сайлау комиссиясы тартылды. Олардың ішінде 33 аумақтық, 30 округтік және 160 учаскелік сайлау комиссиясы. Жалпы алғанда олардың құрамында бір жарым мыңнан астам мүше бар. Олардың барлығы тиісті дайындықтан өтіп, сайлау өткізуге әзір.
Дауыс беруге арналған үй-жайларды сайлау кабиналарымен, тұрақты және алып жүретін жәшіктермен, қажет байланыс құралдарымен, көлікпен, компьютерлік және көбейту техникасымен жарақтандыру аяқталды, сайлау бюллетеньдері жеткізілді.
Сонымен қатар учаскелік сайлау комиссияларының үй-жайларында сайлаушылар тізімдерін нақтылау процесі жалғастырылуда. Сайлаушылар дауыс беру күніне дейін және сайлау күні сайлау учаскесіне келіп, сайлаушылар тізімдеріндегі өзі туралы деректерді тексере алады.
Тізімдерде сайлаушы туралы деректер болмаған жағдайда ол мекенжай анықтамасын ұсынуы қажет, себебі заңнамаға сәйкес тұрғылықты жері бойынша тіркелгені туралы факт тізімге енгізу үшін негіздеме болып табылады.
Дауыс беру 30 қазанда жергілікті уақыт бойынша 7.00-ден 20.00-ге дейін 160 сайлау учаскесінде өтеді.
Дауыс беру барысы мен дауыстарды санау рәсімін байқауға кандидаттардың сенім білдірген адамдары, саяси партиялардың, қоғамдық бірлестіктердің, ҮЕҰ-ның, сондай-ақ Қазақстан Республикасы бұқаралық ақпарат құралдарының өкілдері қатыса алады.
Қазіргі уақытта Орталық сайлау комиссиясына мәслихаттардың шығып қалған депутаттарының орнына сайлау жөніндегі сайлау науқанына байланысты шағымдар мен өтініштер келіп түскен жоқ.