2011 жылғы 19 тамызға тағайындалған Қазақстан Республикасы Парламенті Сенатының депутаттарын сайлау жөніндегі сайлау бюллетеньдері туралы
«Қазақстан Республикасындағы сайлау туралы» Қазақстан Республикасы Конституциялық заңының 12, 24 және 37-баптарына сәйкес Қазақстан Республикасы Орталық сайлау комиссиясы ҚАУЛЫ ЕТЕДІ:
1. Сайлау бюллетеньдерін басуға арналған бланкілер осы қаулыға қосымшаға сай (қызмет бабында пайдалану үшін) қорғалу дәрежесімен орталықтандырылған түрде тиісті облыстағы, қаладағы таңдаушылардың жалпы санына тең санда, олардың бір пайызы мөлшеріндегі резервімен, дайындалсын және облыстық, Астана және Алматы қалалық сайлау комиссияларына жіберілсін.
2. Облыстық, Астана және Алматы қалалық сайлау комиссиялары 2011 жылғы 19 тамызға тағайындалған Қазақстан Республикасы Парламенті Сенатының депутаттарын сайлау жөніндегі сайлау бюллетеньдерін (бұдан әрі – сайлау бюллетеньдері) Қазақстан Республикасы Орталық сайлау комиссиясы бекіткен нысанға сәйкес дайындасын.
3. Сайлау бюллетенінің мәтініне өзгерістер енгізуге, егер «Қазақстан Республикасындағы сайлау туралы» Қазақстан Республикасы Конституциялық заңында белгіленген тәртіппен сайлау бюллетенінің мәтініне тегі, аты, әкесінің аты енгізілген кандидат өз кандидатурасын алып тастаса немесе мәслихат (мәслихаттар) кандидатты ұсыну туралы өз шешімінің (шешімдерінің) күшін жойса немесе кандидатты тіркеу туралы шешімнің күшін жойса, рұқсат етіледі деп белгіленсін. Өзгерістер енгізуді облыстық, Астана және Алматы қалалық сайлау комиссиялары мынадай тәртіппен жүргізеді: комиссия мүшесі бірыңғай тәсілмен осы кандидаттың тегін, атын, әкесінің атын және оның оң жағында орналасқан шаршыны сиямен сызып тастайды және сызып тасталған кандидат тегінің, атының, әкесінің аты мен шаршының оң жағына өз қолын қояды.
4. Осы қаулы облыстық, Астана және Алматы қалалық сайлау комиссияларына жіберілсін.
5. Осы қаулының орындалуын бақылау Қазақстан Республикасы Орталық сайлау комиссиясының хатшысы Б.С. Мелдешовке жүктелсін.

Қазақстан Республикасы
Орталық сайлау комиссиясының
Төрағасы
Қ. Тұрғанқұлов

Қазақстан Республикасы
Орталық сайлау комиссиясының
хатшысы
Б. Мелдешов

Астана, 2011 жылғы 30 тамыз
№ 53/91