2011 жылғы 18 ақпан күні Орталық сайлау комиссиясы Н.Ә.Назарбаевты Қазақстан Республикасы Президенттігіне кандидат ретінде тіркеді
2011 жылғы 18 ақпан күні Орталық сайлау комиссиясы Н.Ә.Назарбаевты Қазақстан Республикасы Президенттігіне кандидат ретінде тіркеді.
«Қазақстан Республикасындағы сайлау туралы» Конституциялық заңның 59-бабының 5-тармағына сәйкес, Орталық сайлау комиссиясына:
1. «Нұр Отан» Халықтық Демократиялық партиясы» қоғамдық бірлестігі XIII съезінің Нұрсұлтан Әбішұлы Назарбаевты «Нұр Отан» Халықтық Демократиялық партиясы» қоғамдық бірлестігі атынан Қазақстан Республикасы Президенттiгіне кандидат ретінде ұсыну жөнiндегi, осы қоғамдық бiрлестiктi Республиканың Әдiлет министрлiгiнде тiркеу туралы құжаттың көшiрмесi қоса тiркелген, хаттамасының үзiндiсі;
2. Н.Ә.Назарбаевтың Қазақстан Республикасы Президенттiгіне кандидат болып дауысқа түсуге келiсiм беру жөнiндегi өтiнiші;
3. Н.Ә.Назарбаевтың өмiрбаяндық деректерi;
4. аумақтық сайлау комиссиясының азаматтардың Н.Ә.Назарбаевты қолдап жинаған қолдарын тексеру нәтижелерi жөнiндегi хаттамасы;
5. кандидат пен оның жұбайының (зайыбының) табысы және мүлкі туралы декларация тапсырғаны туралы салық органының анықтамасы;
6. кандидаттың сайлау жарнасын енгiзгенiн куәландыратын құжат ұсынылды.
«Қазақстан Республикасындағы сайлау туралы» Конституциялық заңның 59-бабының 5-тармағына сәйкес, Президенттiкке кандидатты облыстардың кем дегенде үштен екiсiнің, Алматы және Астана қалаларының атынан теңдей өкiлдiк ететiн сайлаушылардың жалпы санының кем дегенде 1% қолдауы тиiс. Н. Ә. Назарбаевты қолдап республиканың 16 өңірінен 717 340 сайлаушының қолы жиналған. Бұл белсенді сайлау құқығы бар азаматтардың 8 %-ға жуығы.
Ұсынылған құжаттарды қарай келе, Қазақстан Республикасының Орталық сайлау комиссиясы олардың «Қазақстан Республикасындағы сайлау туралы» Конституциялық заң қоятын талаптарға сәйкестігін анықтады және Нұрсұлтан Әбішұлы Назарбаевты Қазақстан Республикасы Президенттігіне кандидат ретінде тіркеу туралы қаулы қабылдады.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44