Қазақстан Республикасы мәслихаттарының шығып қалған 

депутаттарының орнына сайлау жөніндегі дауыс беруге арналған сайлау 

бюллетеньдері туралы

«Қазақстан Республикасындағы сайлау туралы» Қазақстан Республикасы Конституциялық заңының 12-бабының 1) және 6) тармақшаларына, 14-бабының 7) тармақшасына, 16-1-бабының  4) тармақшасына, 37-бабына сәйкес Қазақстан Республикасының Орталық сайлау комиссиясы ҚАУЛЫ ЕТЕДІ: 

1. Мәслихаттардың шығып қалған депутаттарының орнына сайлау жөніндегі дауыс беруге арналған сайлау бюллетеньдерінің қорғалу дәрежесі осы қаулыға қосымшаға сәйкес (қызмет бабында пайдалану үшін) белгіленсін.

2. Өңірлердің тиісті сайлау комиссиялары:

1) бірмандаттық сайлау округтері бойынша сайланатын мәслихаттардың шығып қалған депутаттарының орнына сайлау жөніндегі бюллетеньдердің мәтіндерін бекітсін;

2) сайлау бюллетеньдерін осы қаулыға қосымшаға сәйкес тиісті округтегі сайлаушылардың жалпы санының бір проценті резервімен сайлау округіндегі сайлаушылардың  санына тең мөлшерде дайындауды қамтамасыз етсін; 

3) сайлау бюллетеньдерін сайлау учаскелеріне уақтылы жеткізуді қамтамасыз етсін.  

3. Осы қаулы облыстардың, Астана және Шымкент қалаларының сайлау комиссияларына жіберілсін. 

4. Осы қаулы Қазақстан Республикасы Орталық сайлау комиссиясының интернет-ресурсында жариялансын.