Қазақстан Республикасы Президентінің «Қазақстан Республикасы аудандары, облыстық маңызы бар қалалары әкімдерінің сайлауын тағайындау туралы» 2006 жылғы 6 маусымдағы № 130 Жарлығына сәйкес Қазақстан Республикасының Орталық сайлау комиссиясы ҚАУЛЫ ЕТЕДІ:

1. 2006 жылғы 20 қазанға Қазақстан Республикасының мынадай әкімшілік-аумақтық бөліністерінде аудандар, облыстық маңызы бар қалалар әкімдерін сайлау тағайындалсын:
Ақмола облысының Ақкөл, Есіл, Жарқайың, Зеренді, Қорғалжын аудандары және Степногорск қаласы;
Ақтөбе облысының Әйтеке би, Алға, Ырғыз, және Ойыл аудандары;
Алматы облысының Балқаш, Қарасай, Кербұлақ, Көксу, Райымбек аудандары және Текелі қаласы;
Атырау облысының Қызылқоға және Мақат аудандары;
Шығыс Қазақстан облысының Абай, Бородулиха, Глубокое, Күршім, Шемонаиха аудандары және Риддер қаласы;
Жамбыл облысының Жамбыл, Қордай, Талас аудандары;
Батыс Қазақстан облысының Бөкей ордасы, Қаратөбе, Сырым және Шыңғырлау аудандары;
Қарағанды облысының Ақтоғай, Осакаров, Нұра аудандары және Приозерск, Сәтпаев, Теміртау қалалары;
Қызылорда облысының Арал және Жаңақорған аудандары;
Қостанай облысының Аманкелді, Әулиекөл, Қамысты, Қарасу, Қостанай аудандары және Рудный қаласы;
Маңғыстау облысының Бейнеу ауданы және Жаңаөзен қаласы;
Павлодар облысының Качиры, Май, Успен аудандары және Екібастұз қаласы;
Солтүстік Қазақстан облысының Ақжар, Қызылжар, Тайынша және Ғабит Мүсірепов атындағы аудандары;
Оңтүстік Қазақстан облысының Мақтаарал, Созақ, Түлкібас аудандары және Арыс қаласы.
2. Тиісті облыстардың әкімдері бұл сайлауды ұйымдық, материалдық-техникалық және қаржылай қамтамасыз етуге жәрдем көрсетсін.
3. Осы қаулы көрсетілген аудандардың және облыстық маңызы бар қалалардың әкімдерін сайлауды өткізуді ұйымдастыру үшін облыстық сайлау комиссияларына жіберілсін.
4. Осы қаулы бұқаралық ақпарат құралдарында жария етілсін.

Қазақстан Республикасы Орталық сайлау комиссиясының Төрағасы

О. Жұмабеков

Астана қаласы, 2006 жылғы 22 тамыз
№ 71/136

---

«Қазақстан Республикасындағы сайлау туралы» Қазақстан Республикасының Конституциялық заңы 12-бабының 1) тармақшасына сәйкес Қазақстан Республикасы Орталық сайлау комиссиясы ҚАУЛЫ ЕТЕДІ:
1. Қоса беріліп отырған Қазақстан Республикасының аудандары, облыстық маңызы бар қалалары әкімдерінің 2006 жылғы 20 қазанға тағайындалған сайлауын дайындау мен өткізу жөніндегі негізгі іс-шаралардың күнтізбелік жоспары (бұдан әрі – Күнтізбелік жоспар) бекітілсін.
2. Күнтізбелік жоспар сайлауды өткізуді ұйымдастыру үшін облыстық сайлау комиссияларына жіберілсін.
3. Күнтізбелік жоспар бұқаралық ақпарат құралдарында жариялансын.

Төраға

О. Жұмабеков

Астана қаласы, 2006 жылғы 22 тамыз
№ 71/137

---

1. Тиісті әкімшілік-аумақтық бөлініс тұрғындарының назарына бұқаралық ақпарат құралдары арқылы сайлау күні туралы хабарды жеткізу.

2. Бұқаралық ақпарат құралдарында тиісті аумақтық сайлау комиссиясының құрамын жариялау.

3. Әкімдікке кандидаттарды балама негізде облыс әкімінің ұсынымы мен кандидаттардың тиісті әкімшілік-аумақтық бөліністің аумағында әкімдікке кандидаттар ретінде дауысқа түсуге келісетіні туралы өтініштерді беруі арқылы ұсыну.

4. Таңдаушылардың тізімдерін жасау.

5. Әкімдікке кандидаттың оған Қазақстан Республикасы Конституциясының 33-бабы 3-тармағының және Қазақстан Республикасының аудандары, облыстық маңызы бар қалалары әкімдерінің сайлауын өткізу ережесінде қойылатын талаптарға сәйкестігін анықтау, тиісті хаттама жасау.

6. Тұрғылықты жері бойынша салық органдарына 2006 жылғы бірінші тамызға Қазақстан Республикасының уәкілетті мемлекеттік органы белгілеген тәртіппен және нысанда табысы мен мүлкі туралы декларация тапсыру.

7. Кандидаттарды тіркеу және тиісті куәлік тапсыру

8. Жергілікті бұқаралық ақпарат құралдары арқылы немесе өзге тәсілмен кандидаттардың тіркелгені туралы хабарлау.

9. Кандидат пен оның зайыбы (жұбайы) жариялаған табысы және мүлкі туралы мәліметтердің дұрыстығын тексеру.

10. Кандидаттардың сенім білдірілген адамдарын тіркеу және әрқайсысына тиісті куәлік беру.

11. Сайлау алдындағы үгітті жүргізу

12. Сайлау қорларының арнаулы уақытша шоттарын ашу

13. Дауыс беруге арналған пунктті ашу, тиісті хаттама жасау.

14. Әкімнің сайлауын өткізу. Әкімді сайлау жөнінде дауыстарды санау және дауыс беру нәтижелерін жария ету, таңдаушылар-мәслихат депутаттары отырысының хаттамасын және әкімді сайлаудың нәтижелері туралы хаттаманы жасау.

15. Жергілікті бұқаралық ақпарат құралдарында сайлау қорытындылары туралы хабарлау.

16. Сайланған әкімді тіркеу. Шешімді жоғары тұрған әкімге және тиісті мәслихатқа ұсыну.

17. Сайланған әкімді тіркеу туралы хабарды бұқаралық ақпарат құралдарында жариялау.