2015 жылғы 24 наурызда Қазақстан Республикасы Орталық сайлау комиссиясының Төрағасы Қ. Тұрғанқұлов Қазақстан Республикасы Президентінің кезектен тыс сайлауын байқау жөніндегі ЕҚЫҰ/ДИАҚБ Миссиясының Басшысы Корнелия Виллемиен Анке Йонкер ханыммен кездесті.
Кездесуге сондай-ақ, ЕҚЫҰ/ДИАҚБ Миссиясы Басшысының орынбасары Меган МакКейб Фитцжеральд, Ортсайлауком Төрағасының орынбасары В.К. Фоос, Ортсайлауком хатшысы Б.С. Мелдешов, ҚР ОСК мүшелері Т.В. Охлопкова, М.А. Сәрсембаев және Л.Ж. Сүлеймен, ЕҚЫҰ/ДИАҚБ Миссиясының құқықтық мәселелер жөніндегі маманы Мерсе Кастеллс Висенте, сайлау мәселелері жөніндегі маманы Лусиан Рауль Мюресан және ЕҚЫҰ/ДИАҚБ-ның сайлау жөніндегі кеңесшісі Радивое Груичь қатысты.
Ортсайлауком Басшысы Йонкер ханымды Орталық сайлау комиссиясының кезектен тыс сайлауды әзірлеу және өткізу жөніндегі жұмысымен, сайлау науқанының негізгі кезеңдерімен және оның ерекшеліктерімен таныстырды.
«Біз ынтымақтастыққа дайынбыз, халықаралық байқаушылар үшін ашықпыз және олардың байқауға қатысуын алдағы сайлаудың жариялы, ашық, айқын болуын қамтамасыз етуге, сайлау процесіне қатысушылардың сайлауға деген сенімін арттыруға жәрдемдесу ретінде қарастырамыз», - деп атап өтті Қ. Тұрғанқұлов.
ЕҚЫҰ/ДИАҚБ Миссиясының Басшысы сайлау науқаны барысын байқауға қатысуға шақырғаны үшін ризашылығымен қоса, Миссия сарапшылары Ортсайлауком мүшелерімен сайлау процесінің барлық аспектілері бойынша тығыз және кәсіби ынтымақтастықта болатынына сенімін білдірді.
«Ынтымақтастықтың оң және тиімді боларына сенім білдіреміз», - деді ол.
«Біздің өзара іс-қимыл тәжірибеміз бар. Ортсайлауком өкілдері Миссия сарапшыларын бүкіл науқан бойы қызықтыратын барлық мәселелерді олармен жұмыс бабында талқылай алады деп ойлаймын», - деді Қ. Тұрғанқұлов.
Кездесу барысында сондай-ақ қазақстандық билік пен сайлау органдары сайлау науқанының сайлау заңнамасының нормалары мен демократиялық сайлаудың жалпыға танымал халықаралық қағидаттарына қатаң сәйкес түрде өтетініне бар күш-жігерін жұмсайтыны атап өтілді. «Бұған басшылықтың саяси еркі, сайлау ұйымдастырушылардың тәжірибесі мен білімі жетерлік», - деп ерекше атап көрсетті Қ. Тұрғанқұлов.
Кездесу соңында Қ. Тұрғанқұлов ЕҚЫҰ/ДИАҚБ Миссиясының сарапшыларына сайлауды әділ және адал байқауда табыс тіледі. «Осы тұрғыда Миссия сарапшыларының, Ортсайлауком мүшелері мен барлық сайлау процесіне қатысушылардың мүддесі толығымен сәйкес келеді деп ойлаймын» - деп атап өтті ол.

Қазақстан Республикасы
Орталық сайлау комиссиясының
баспасөз қызметі
тел. 75-23-69