2015 жылғы 4 наурызда Қазақстан Республикасының Президенттігіне кандидаттың мемлекеттік тілді еркін меңгергендігін анықтау жөніндегі лингвистикалық комиссияның отырысы өтті.

Комиссия мүшелері комиссия жұмысына қатысты ұйымдастыру мәселелерін, Ортсайлаукомның «Қазақстан Республикасының Президенттігіне кандидаттың мемлекеттік тілді еркін меңгергендігін анықтау рәсімі туралы» 2015 жылғы 31 тамыздағы қаулысымен айқындалатын Қазақстан Республикасының Президенттігіне кандидаттың мемлекеттік тілді еркін меңгергендігін анықтау рәсімін талқылады.

Аталған қаулыға сәйкес мемлекеттік тілді еркін меңгергендігін анықтау үшін:

1) лингвистикалық комиссия ұсынған тақырып бойынша көлемі екі беттен аспайтын жазбаша тапсырма жазуы;

2) лингвистикалық комиссия ұсынған көлемі үш баспа беттен аспайтын мәтінді оқуы;

3) лингвистикалық комиссия ұсынған тақырып бойынша көпшілік алдында кемінде он бес минут сөз сөйлеуі талап етіледі.

Лингвистикалық комиссияның отырысында оның мүшелері мен Қазақстан Республикасының Президенттігіне кандидаттан басқа Қазақстан Республикасы Орталық сайлау комиссиясының мүшелері байқаушылар ретінде қатысуға құқылы.

Лингвистикалық комиссияның шешімі комиссия мүшелері санының көпшілік дауысымен ашық дауыс беру арқылы қабылданады және отырыс хаттамасымен ресімделіп, отырыстағы Қазақстан Республикасы Орталық сайлау комиссиясының мүшесіне кідіріссіз тапсырылады.

Лингвистикалық комиссия мүшелері қазіргі уақыттағы өлшемдер үміткердің мемлекеттік тілді білу деңгейін айқындауға мүмкіндік беретінін атап өтті.

Сондай-ақ олар комиссия жұмысы ашық және жариялы түрде жүзеге асырылатынын, ал бұқаралық ақпарат құралдары әр кандидат бойынша шешім қабылдау барысын байқау мүмкіндігіне ие болатынын атап көрсетті.

Қазақстан Республикасы
Орталық сайлау комиссиясының
баспасөз қызметі
тел. 75-28-43, 75-28-44