Мәслихаттардың шығып қалған депутаттарының орнына сайлау науқанының барысы туралы (2014 жылғы 11 наурыздағы жағдай бойынша)
«Қазақстан Републикасындағы сайлау туралы» Қазақстан Республикасы Конституциялық заңының 101-бабы 4-тармағына сәйкес ағымдағы жылдың 30 наурызда республиканың 14 өңірінде мәслихаттардың шығып қалған депутаттарының орнына сайлау 59 сайлау округтерінде өтеді.
Барлығы Астана қ. мәслихатының 1 депутаты, облыстық мәслихаттардың 7 депутаты, қалалық мәслихаттардың 12 депутаты және аудандық мәслихаттардың 39 депутаты сайланады.
Сайлау науқаны қажетті қаржылық және материалдық-техникалық ресурстармен қамтамасыз етілген.
Сайлау науқаны барысында 188 кандидат ұсынылды, олардың 61-ін саяси партиялар, 2-ін қоғамдық бірлестіктер ұсынды және тағы 125-і өзін-өзі ұсынғандар.
Қазіргі сәтте мәслихаттар депутаттығына кандидаттарды тіркеу аяқталды. Барлығы 170 кандидат тіркелді. Олардың 120-сы (70,6%) – ер адамдар және 50-і (29,4%) – әйел адамдар.
67 кандидат Қазақстан Республикасы саяси партияларының мүшелері болып табылады, 43-і өзінің партияға тиесілілігін көрсетпеген.
Тіркелген кандидаттардың ішінде 6 ұлттың өкілі бар.
Орташа жасы – 41 жас.
140 (82,4%) кандидаттың жоғары білімі бар, 20-сының (11,8%) арнайы орта және 10-ының (5,9%) орта білімі бар.
Кандидаттардың 43% -ы мемлекеттік мекемелерде, ұйымдарда және кәсіпорындарда, 30%-ы – коммерциялық құрылымдарда қызмет жасайды.
Қазіргі уақытта 28 наурыз күні 24 сағатта аяқталатын сайлауалды үгіт жүріп жатыр. Сайлау өтетін күннің алдындағы күні және дауыс беру күні сайлауалды үгітке тыйым салынады.
15 наурыздан бастап азаматтар тиісті сайлау комиссияларының үй-жайында сайлаушылар тізімімен таныса алады, өзі туралы деректерді тексеріп, қажет болған жағдайда тиісті түзетулер енгізуді талап етуіне болады.
Осы сәтте сайлау науқаны сайлау заңнамасы нормаларының талаптарына сәйкес өтіп жатыр.
Орталық сайлау комиссиясына арыздар мен өтініштер келіп түскен жоқ.
Мәслихаттар шығып қалған депутаттарының орнына сайлау науқанының барысымен танысу мақсатында 11-14 наурыз аралығында Ортсайлауком мүшелері М.А. Сәрсембаев, Т.В. Охлопкова мен Л.Ж. Сүлеймен Оңтүстік Қазақстан, Солтүстік Қазақстан және Атырау облыстарына барып қайтады.
Сапар барысында Ортсайлауком мүшелері облыстың аумақтық және округтік сайлау комиссияларының мүшелерімен сайлау заңнамасының нормаларын сақтауды қамтамасыз ету мәселелері, сондай-ақ дауыс беру күніне дайындық бойынша сайлау органдарының міндеттері талқыланатын кездесулер өткізеді.
Өңірлердегі сайлаушылар тізімдерін құру және түзету жұмыстарын ұйымдастыруды сараптауға ерекше көңіл бөлінеді.



Қазақстан Республикасы
Орталық сайлау комиссиясының
баспасөз қызметі
тел. 75-28-43, 75-28-44