Қазақстан Республикасы Орталық сайлау комиссиясы 2012-2013 жылдары жастарды құқықтық оқыту жөніндегі жобаны іске асыру нәтижелерін, сондай-ақ Қазақстан Республикасының жоғары оқу орындары студенттері мен магистранттары арасында өткен Қазақстан Республикасындағы сайлау құқығы және сайлау процесі мәселелері жөніндегі үздік жұмыс конкурсының нәтижелерін қорытындылады
2013 жылғы 27 қарашада Қазақстан Республикасы Орталық сайлау комиссиясында 2012-2013 жылдары жастарды құқықтық оқыту жөніндегі жобаны іске асыру нәтижелерін қорытындылау және Қазақстан Республикасының жоғары оқу орындары студенттері мен магистранттары арасында өткен Қазақстан Республикасындағы сайлау құқығы және сайлау процесі мәселелері жөніндегі үздік жұмыс конкурсының жеңімпаздарын марапаттау рәсімі өтті.
Өзінің құттықтау сөзінде Ортсайлаукомның Төрағасы Қ. Тұрғанқұлов: «Ортсайлауком 2012-2013 жылдары іске асырған жастарды құқықтық оқыту жөніндегі жоба мен студенттер мен магистранттар арасында өткізілген конкурсты мемлекеттік мереке - Тұңғыш Президент күні қарсаңында қорытындылауымыз тегін емес. Мемлекет басшысы - Назарбаев университеті жастарының алдында сөйлеген сөзінде: «Сендер, тәуелсіз Қазақстанның келешегі үшін тарихи жауапкершілік арқалайтын азаматсыңдар. Сендер, тәуелсіз қазақ елінің білімді жастары, өз соқпақтарыңды салып, оны елді дамуға бастайтын даңғылға айналдыруға тиіссіңдер!» дегенін Сіздер жақсы білесіздер деп ойлаймын.
Ортсайлауком ұйымдастырған конкурс тап осы мүмкіндіктердің бірі болды. Бұл - біз жыл бойы жүргізген үлкен, жүйелі және көпжоспарлы жұмыстың шешуші кезеңі» - деп атап көрсетті.
2012 жылғы қазаннан бастап 2013 жылғы маусымға дейінгі кезеңде басты мақсаты сайлауды жастар арасында танымал ету, болашақ жас сайлаушылардың демократиялық процестерге қатысу тәжірибесін жинақтауы болған жобаның іс-шаралары еліміздің 11 аумағында өтті.
Жоба 50-ге жуық жоғары оқу орнын, 780 мектеп, 135 колледж, 5 кәсіптік лицей, 10 балалар үйі және 2 өндірістік ұйымды қамтыды.
Мектеп, колледж оқушылары, студенттер, жастар этно-мәдени бірлестіктерінің мүшелері, жұмысшы және ауыл жастарының өкілдері белсенділік танытып қана қоймай, ұлттық сайлау жүйесінің даму процесін талқылауға жоғары қызығушылық танытты.
Жоба шеңберінде демократиялық сайлау процесінің даму тарихы мен үрдісі туралы жария және интерактивті лекциялар ұйымдастырылып, жастардың сайлау процесіне қатысу мәселелері жөнінде ашық пікірталастар өткізілді, мектептер мен жоғары оқу орындарындағы сайлау тәжірибесін талдау, жас сайлаушылардың Қазақстан Республикасының сайлау құқығы негіздерін білу деңгейіне әлеуметтік зерттеу жүргізілді.
Орталық сайлау комиссиясының өкілдері конференциялар, дөңгелек столдар топтамаларын өткізу, жастардың сайлау процесіне қатысуына байланысты өзекті тақырыптарды талқылау үшін диалог алаңдарын ұйымдастыру барысында жастардың 300-ден астам сұрақтарына жауап берді.
Осы жұмыстың нәтижесі бойынша Ортсайлауком жоғары оқу орындары мен мектептерге оқу бағдарламаларында сайлау құқығы жөнінде арнайы курс, сондай-ақ жастардың электораттық белсенділігін арттыру бойынша жұмыс жүргізу үшін үлгі жоспарлар мен әдістемелік құралдарды белсене қолдануды ұсынды.
Студенттер мен магистранттар арасындағы Қазақстан Республикасындағы сайлау құқығы және сайлау процесі мәселелері жөніндегі үздік жұмысқа Ортсайлауком ұйымдастырған конкурс 2013 жылғы 10 қаңтардан бастап 31 мамырға дейінгі уақытта екі кезеңде өткізілді.
Конкурсқа қатысу үшін еліміздің 38 жоғары оқу орнының студенттері мен магистранттарының 200-ден астам жұмысы ұсынылды. 42 ғылыми жұмыс, 7 слоган және 7 бейнеролик өңірлік кезеңнің жеңімпаздары атанып, республикалық конкурсқа қатысу үшін Ортсайлаукомға жіберілді.
Сонымен қатар Ортсайлаукомның өзіне тағы 16 ғылыми жұмыс, 8 слоган және 9 бейнеролик келіп түсті.
Конкурстың республикалық кезеңі нәтижелерін қорытындылау үшін құрамына құқық, саясат және әлеуметтану саласындағы Ортсайлауком ғалымдары мен сарапшылары енген республикалық қазылар алқасы құрылды.
Қазылар алқасын Ортсайлауком мүшесі, профессор, заң ғылымдарының докторы М.А. Сәрсембаев басқарды.
Конкурсқа ұсынылған әрбір жұмыс талданып, мұқият түрде талқыланды және әрқайсысына арнайы рецензия дайындалды.
Нәтижесінде «Қазақстан Републикасындағы сайлау құқығы мен сайлау процесінің мәселелері жөніндегі ғылыми жұмыс», «Сайлау науқанының үздік слоганы», «Сайлау тақырыбына үздік бейнеролик»3 номинациясында 12 конкурс жеңімпазы анықталды.
Бұдан басқа қазылар алқасының көтермелеуі мен Қазақстан Республикасы Орталық сайлау комиссиясының алғыс хаттарына тағы 8 конкурсант ие болды.
Ортсайлауком Басшысы Астана және Алматы қалаларының, Ақмола, Атырау, Шығыс Қазақстан, Батыс Қазақстан, Қарағанды, Қостанай және Оңтүстік Қазақстан облыстары жоғары оқу орындарынан келген конкурс жеңімпаздары мен номинанттарына естелік сыйлықтарды, сондай-ақ марапаттау қағаздары мен алғыс хаттарды тапсырды.
«Еліміздің сайлау заңнамасына Сіздердің танытқан қызығушылықтарыңыз оның жас сайлаушылар арасында таралуына негіз болатынына сенімдіміз. Ал мұның міндетті түрдегі нәтижесі қазақстандық жастардың жалпы электораттық мәдениет деңгейінің, қоғамдық-саяси белсенділігінің артуы болмақ» – деді Қ. Тұрғанқұлов.




Қазақстан Республикасы
Орталық сайлау комиссиясының
баспасөз қызметі
тел. 75-28-43, 75-28-44