ҚР ОСК Төрағасы Қ.Т.Тұрғанқұлов Азиялық сайлау органдары ассоциациясы Атқарушы комитетінің отырысына қатысуда
ҚР ОСК Төрағасы Қ.Т.Тұрғанқұлов Индияда, Нью-Дели қаласында 2012 жылғы 30 шілдеде ашылған Азиялық сайлау органдары ассоциациясы (АСОА) Атқарушы комитетінің отырысына қатысуда.
АСОА Атқарушы комитетінің мүшесі болып табылатын Қазақстан Республикасының Орталық сайлау комиссиясы 1998 жылы құрылған және азиялық елдердің сайлау органдары арасындағы ынтымақтастықты тереңдету, ақпарат пен тәжірибе алмасу, сайлауларды байқауға қатысу, сайлауға әкімшілік ету сұрақтары бойынша консультациялар өткізу арқылы Азиядағы демократиялық процестерді тереңдетуге ықпа етуді көздейтін Ассоциацияның қызметіне белсене қатысып келеді. Қазақстан Республикасынан басқа, АСОА Атқарушы комитетіне Корея Республикасы, Индия Республикасы, Тайвань және Филиппин Республикасы мүше болып табылады. Атқарушы комитеттің құрамы тең географиялық өкілдік ұстанымы негізінде қалыптастырылады. Қазақстан Республикасының Орталық сайлау комиссиясы Орталық Азия өңірінен өкіл ретінде сайланған.
Атқарушы комитеттің Нью-Делиде ашылған отырысы Бас Ассамблея мен АСОА-ның қызметіне қатысты көптеген маңызды сұрақтарды талқылауды және шешімдер қабылдауды мақсат тұтады. Сондай-ақ отырыстың күн тәртібі бірқатар ұйымдастыру сұрақтарын қамтиды,, соның ішінде АСОА-ның Атқарушы хатшысын тағайындау, Атқарушы комитеттің 2013 жылғы кезекті отырысын қабылдайтын елді анықтау, Ассоциацияның хатшылығын құру және оны тұрақты жерде орналастыру мәселелерін қарау. Сонымен қатар АСОА-ның веб-сайтын ашу және АСОА-ға мүше елдер арасындағы ақпарат алмасуды күшейту жолдарын іздестіру көзделуде.
Қазақстандық делегация АСОА-ның Атқарушы комитетінің мәжілісіне осы халықаралық ұйымның қызметін одан әрі жетілдіруге бағытталған нақтылы ұсыныстармен барды, олар туралы Қ.Тұрғанқұлов өз баяндамасында айтатын болады.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44