Жаңаөзен қаласында партиялық тізімдер бойынша сайланатын Парламент Мәжілісі депутаттарының сайлауы, және мәслихаттар депутаттарының сайлауы 2012 жылғы 15 қаңтарда өтеді
Конституциялық Кеңестің 11 қаңтар күні өткен отырысында оның мүшелері Жаңаөзен қаласында парламенттік сайлауды өткізуге тыйым салу және мәслихаттар депутаттарының сайлауын басқа уақытқа ауыстыру туралы бұрын қабылданған шешімге Қазақстан Республикасының Президенті қойған ветоны еңсере алмады.
Осыған байланысты Конституциялық Кеңес Орталық сайлау комиссиясының хаты бойынша Конституциялық іс жүргізуді қысқартты.
11 қаңтарда Орталық сайлау комиссиясы «Маңғыстау облысының Жаңаөзен қаласындағы төтенше жағдай кезінде сайлау заңнамасының қолданылу ерекшеліктері туралы» Қазақстан Республикасы Орталық сайлау комиссиясының 2012 жылғы 6 қаңтардағы № 1/153 қаулысының күшін жою туралы қаулы қабылдады. Бұл қаулыға сәйкес Жаңаөзен қаласында партиялық тізімдер бойынша сайланатын Парламент Мәжілісі депутаттарының сайлауы, және мәслихаттар депутаттарының сайлауы 2012 жылғы 15 қаңтарда өтетін болады
Орталық сайлау комиссиясы сайлаудың өтпейтіні туралы шешім қабылдаған сәттен бастап өткен алты күн ішінде Жаңаөзен қаласындағы сайлау комиссияларының қызметі уақытша тоқтатылған.
Алайда, барлық сайлау құжаттары, сондай-ақ әдістемелік және ақпараттық материалдар сақталған. (Жаңаөзен қаласына жеткізілген брошюралар, плакаттар мен билбордтарды әзірлеуге жұмсалған қаржы миллион теңгеге жуық соманы құрады).
Орталық сайлау комиссиясы, Маңғыстау облыстық және Жаңаөзен қалалық сайлау комиссиялары төтенше жағдайдың сақталуы жағдайында осы аумақтық-әкімшілік бірлікте Мәжіліс пен мәслихаттар депутаттарының сайлауын әзірлеу мен өткізу жөніндегі шараларды белсенді жалғастыратын болады.
«Әрине, сайлау науқаны барысында болған үзіліс үгіт жұмысына, әсіресе мәслихат депутаттығына кандидаттардың сайлауалды үгітіне, әсер етті.
Саяси партиялардың үгіт науқаны республиканың барлық сайлаушыларына бағытталған әрі негізінен бұқаралық ақпарат құралдары арқылы жүргізіледі және Жаңаөзен қаласы халқының үгіт науқаны бойы оларды көруге мүмкіндігі болды.
Дегенмен, мәслихат депутаттығына кандидаттардың қазір жағдайы тең, өйткені үгіт жұмысындағы үзіліс депутаттық мандаттан үміткерлердің бәріне бірдей әсер етті.
Бастысы, сайлаушылардың конституциялық құқықтары орнына келді және Жаңаөзен қаласында сайлау 2012 жылғы 15 қаңтарда өтетін болады»,- деп атап өтті Ортсайлауком отырысынан кейін өткен брифингте Қ.Тұрғанқұлов.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44