2011 жылғы 28 желтоқсанда Орталық сайлау комиссиясы «Руханият» Партиясының партиялық тізімін тіркеудің күшін жою туралы шешім қабылдады
27 желтоқсанда Орталық сайлау комиссиясына Қазақстан Республикасы Бас прокуратурасының А.Қ.Жағанованың «Руханият» Партиясының партиялық тізімін ұсыну және тіркеу тәртібінің бұзылуы туралы өтінішін қарау нәтижелері туралы тұжырымы келіп түсті.
Өтініште 2011 жылғы 30 қарашада «Руханият» Партиясының Қазақстан Республикасы Парламенті Мәжілісінің депутаттығына кандидаттардың тізімі бекітілген кезектен тыс 8-ші съезін өткізу кезінде, съезді шақыру мен өткізудің «Саяси партиялар туралы» заңмен және партияның Жарғысымен белгіленген тәртібі сақталмағаны көрсетілген.
Бұл шағым бойынша Бас прокуратура ұйымдастырған тексеру шараларының нәтижелері бойынша өтініште келтірілген фактілер расталған.
Атап айтқанда, партияның Республикалық комитетінің отырысында тиісті шешімді қабылдауға партия жарғысымен белгіленген уәкілеттігі бар мүшелерінің қажетті санының (кворумның) болмауы себепті, «Руханият» партиясының 8-ші съезін шақыру тәртібінің бұзылу фактісі орын алған.
«Саяси партиялар туралы» заңның 16-шы бабына сәйкес, саяси партияның съезінде депутаттыққа кандидаттардың Орталық сайлау комиссиясына тіркеу үшін ұсынылатын партиялық тізімі бекітіледі.
Бұл ретте съездің шешімі, съезге саяси партияның барлық облыстық, республикалық маңызы бар қалалық, астаналық филиалдары мен өкiлдiктерiнiң өкiлдерi қатысқан кезде көпшiлiк дауыспен қабылданады.
«Руханият» Партиясының жарғысымен съездердің делегаттарын, өз кезегінде делегаттары қалалық және аудандық конференцияларда сайланатын облыстық, Астана және Алматы қалалық партиялық конференциялар сайлайды деп белгіленген.
«Руханият» Партиясының кезектен тыс 8-ші съезінің хаттамасына сәйкес, оған партияның барлық облыстық және оларға теңестірілген қалалық филиалдары мен өкілдіктерінен 203 делегат қатысқан.
Алайда, тексеру шаралары нәтижесінде Бас прокуратура көпшілік өңірлер партиялық конференцияларды мүлдем өткізбегенін және съезге делегаттар жолдамағанын анықтады.
Съезге партия басшылығының шақыруы негізінде жекелеген облыстардан белгіленген тәртіпте берілген өкілеттіктері жоқ адамдар қатысқан.
Бас прокуратураның мәліметтері бойынша, 12 облыста партиялық конференция өткізілмеген. 2 өңірде олар белгіленген тәртіпті бұза отырып өткізілген, кейбір өңірлердің өкілдері съезге қатысу үшін мүлдем жолға шықпаған.
Осылайша, Қазақстан Республикасы Бас прокуратурасының тұжырымына сәйкес, «Руханият» Партиясының Қазақстан Республикасы Парламенті Мәжілісінің депутаттығына кандидаттар ұсынудың заңнамамен белгіленген тәртібін бұзу факті расталды.
Орталық сайлау комиссиясының отырысында болған талқылау аясында ҚР ОСК мүшесі М.А.Сәрсембаев Алматы, Қызылорда, Жамбыл және Оңтүстік Қазақстан облыстарында орын алған заң бұзушылық фактілері туралы айтты.
«Прокуратураның мәліметтеріне сәйкес бұл облыстардың бір де бірінде партиялық конференциялар заңнамамен және партияның жарғысымен белгіленген ережелерді сақтай отырып өткізілмеген»,- деп атап өтті ол.
Ортсайлауком Төрағасының орынбасары В.К. Фоос «Партияның ішкі келіспеушіліктері Орталық сайлау комиссиясы талдайтын сұрақ болып табылмайды. Біз тек партиялық тізімді ұсынуға қатысты заңнаманы бұзу фактілерін ғана ескереміз. Ал Бас прокуратураның мәліметтері бойынша мұндай фактілер орын алған»,- деді ол.
Сондай-ақ, Ортсайлауком отырысына қатысқан Қазақстан Республикасы Бас прокуратурасының Әлеуметтік-экономикалық саладағы заңдылықты қадағалау жөніндегі департаментінің бастығы, өз кезегінде, «Руханият» Партиясының барлық қарсы пікірлеріне жауап берді және тексеру барысында жасалған тұжырымдардың заңды әрі негізді екенін растады.
Нәтижесінде, «Қазақстан Республикасындағы сайлау туралы» Конституциялық заңның 89-бабына және Қазақстан Республикасы Бас прокуратурасының аталған тұжырымына сәйкес, Орталық сайлау комиссиясы 2011 жылғы 28 желтоқсанда, бұл партияның партиялық тізімдерді ұсыну ережелерін бұзуына байланысты, «Руханият» Партиясының партиялық тізімін тіркеу туралы шешімнің күшін жойды.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44