2011 жылғы 7 желтоқсанда Қазақстан Республикасының Орталық сайлау комиссиясы «Нұр Отан» Халықтық-демократиялық партиясының партиялық тізімін тіркеді
2011 жылғы 5 желтоқсанда партиялық тізімдер бойынша сайланатын Қазақстан Республикасы Парламенті Мәжілісі депутаттығына кандидаттар ұсыну аяқталды.
Қазақстан Республикасы Орталық сайлау комиссиясына барлығы сегіз саяси партияның партиялық тізімдері ұсынылды. Соның ішінде:
1. «Нұр Отан» Халықтық Демократиялық партиясының;
2. Қазақстан Патриоттар партиясының;
3. Қазақстан социал-демократиялық «Ауыл» партиясының;
4. «Руханият» партиясының;
5. «Әділет» Демократиялық партиясының;
6. Жалпыұлттық социал-демократиялық партияның;
7. Қазақстан «Ак жол» Демократиялық партиясының;
8. Қазақстан Коммунистік халық партиясының тізімдерi.
2011 жылғы 7 желтоқсанда Орталық сайлау комиссиясы бірінші партиялық тізімді – «Нұр Отан» Халықтық Демократиялық партиясының тізімін тіркеді.
«Нұр Отан» партиясынан тіркелген кандидаттар арасында 6 ұлттың өкілдері бар. 20 % -дан астамы - әйелдер.
Партиялық тізімге енгізілгендердің жартысынан көбі – жасы 55-ке дейінгі азаматтар, ең жас үміткер – 35-те.
Барлық кандидаттардың жоғары білімі бар. 40%-ға жуығы – заңгерлер мен экономистер. 35%-дан астамы халық шаруашылығының түрлі салаларының мамандары.
Партия ұсынған 50 кандидат бұрын Парламент депутаты болған (49 бұрынғы мәжілісмен, 1 сенатор).
Сондай-ақ, ғылым, мәдениет пен білім қайраткерлері, белгілі спортшылар, коммерциялық құрылымдардың, мемлекеттік органдар мен мекемелердің қызметкерлері бар.
Күнтізбелік жоспарға сәйкес, партиялық тізімдерді тіркеу 15 желтоқсанға дейін жалғасады, ал 16 желтоқсаннан бастап партиялар үгіт жұмысына кірісе алады.
Сондай-ақ, 2011 жылғы 7 желтоқсан күні Орталық сайлау комиссиясы 2012 жылғы 15 қаңтарға тағайындалған Қазақстан Республикасы Парламенті Мәжілісі депутаттарының кезектен тыс сайлауындағы ақпараттық дауларды қарау жөніндегі Қоғамдық Кеңес құрды және тиісті Ережені бекітті.
Қоғамдық кеңестің құрамына елімізге танымал заңгерлер, саясаттанушылар, беделді республикалық және жергілікті бұқаралық ақпарат құралдарының басшыларымен қатар, тиісті өкілетті органдар: Орталық сайлау комиссиясы, Ақпарат және байланыс министрлігі, сонымен қатар, Әділет министрлігінің өкілдері кіріп отыр.
Қоғамдық Кеңес сайлау науқаны кезінде туындайтын ақпараттық дауларды алқалы қарау үшін құрылған, және Қазақстан Республикасы Орталық сайлау комиссиясы жанындағы консультативтік-кеңесші орган болып табылады.
Қоғамдық Кеңестің негізгі міндеттері:
1) барлық сайлау процесіне қатысушылардың бұқаралық ақпарат құралдарына тең қол жеткізуін қамтамасыз етуге және сайлау алдындағы науқан барысын БАҚ-та объективті жария етуге жәрдемдесу;
2) БАҚ пен олардың қызметкерлерінің сайлау процесіне қатысушылармен өзара қарым-қатынастардағы мүдделері мен заңды құқықтарын қорғау;
3) БАҚ қызметінде әдеп нормалары мен кәсіби принциптердің сақталуына ықпал ету, сайлау процесіне қатысушылар мен БАҚ арасындағы дауларды және өзге де жағдайларды шешуге қатысу болып табылады.
Қоғамдық Кеңестің құзыретіне сайлау процесіне қатысушылардың және олардың сайлау науқаны уақытында сайлау заңнамасын сақтауы туралы өтініштерді қарау және олар бойынша шешімдер қабылдау кіреді.
Олар жұртшылықтың назарына материалдарды БАҚ-та жариялау немесе Ортсайлаукомның ресми интернет-ресурсында орналастыру арқылы жеткізіледі.
Оның сыртында, Орталық сайлау комиссиясының отырысында мәслихаттар депутаттарын сайлау бойынша бюллетеньдер бұрын белгіленгендей төрт емес, жеті өңірлік ұйымда басылып шығатыны туралы шешім қабылданды.
Бұл ретте барлық бюллетеньдер қажетті қорғалу деңгейімен қамтамасыз етілетін болады.
Ортсайлаукомның отырысынан кейін өткен брифинг аясында комиссия Төрағасы Қ.Тұрғанқұлов масс-медиа өкілдерін сайлау науқаны барысы туралы хабардар етіп өтті.
Орталық сайлау комиссиясына түсіп жатқан мәліметтерге сәйкес, 2011 жылғы 7 желтоқсандағы жағдай бойынша мәслихаттар депутаттығына 1861 үміткер ұсынылған.
Олардың ішінде облыстық мәслихаттарға – 188, Астана қаласының мәслихатына – 17, Алматы қаласының мәслихатына – 12, аудандық мәслихаттарға – 1349, қалалық мәслихаттарға – 324 кандидат.
Қазіргі сәтке дейін мәслихаттар депутаттығына 24 кандидат тіркелген.
2011 жылғы 16 қараша мен 6 желтоқсан аралығындағы кезеңде Ортсайлаукомға 24 өтініш келіп түскен. Олардың ішінде 18 өтініш сайлау заңнамасын түсіндіру туралы, тағы 6-ы – сайлау органдары мен бұқаралық ақпарат құралдарының қызметіне байланысты.
«Сайлау комиссиялары мүшелерін оқыту бойынша жалғасып отырған жұмыспен қатар өңірлерде сайлаушылар тізімдерін жасау және нақтылау бойынша белсенді жұмыс жүргізіліп жатыр.
Сайлау заңнамасына сәйкес, сайлаушылар тізімдерін жасау үшін жауапкершілік жергілікті атқарушы органдарға жүктелген.
Олар толығымен салыстыра тексерілген және нақтыланған сайлаушылар тізімдерін сайлау учаскелеріне 25 желтоқсаннан кешіктірмей тапсыруы тиіс, ал 30 желтоқсаннан бастап сайлау учаскелерінде сайлаушылардың тізімдермен танысуына мүмкіндік берілетін болады»,-деп атап өтті Ортсайлауком басшысы.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44