БАСПАСӨЗ РЕЛИЗІ

2016 жылғы 26 қаңтарда Қазақстан Республикасы Орталық сайлау комиссиясында

ҚР ОСК қабылдаған сайлау процесінің барлық қатысушыларына үндеудің ережелерін түсіндіру жөніндегі  брифинг болды

Брифинг барысында ҚР ОСК мүшесі Т. Охлопкова азаматтың нақты бір сайлау учаскесінің аумағында тұрғылықты жері бойынша тіркелуі, оны сайлаушылар тізіміне енгізу үшін негіз болып табылатынын түсіндірді. 27 қаңтардан кешіктірмей, сайлау учаскелерінің шекаралары жергілікті бұқаралық ақпарат құралдарында жарияланады.

Егер сайлаушы өзінің тұрғылықты жерінен тыс елді мекенде болса, онда ол 18 ақпаннан кешіктірмей өзінің уақытша болатын жеріндегі әкімдікке сайлау күні өзі дауыс беретін сайлау учаскесінің сайлаушылар тізіміне енгізу туралы өтінішімен жүгіне алады.

Сайлаушы 4 наурыздан бастап сайлау күніне дейін өзінің болатын жерін өзгерткен кезде, учаскелік сайлау комиссиясы сайлаушының өтініші бойынша және жеке басын куәландыратын құжатты көрсеткен жағдайда сайлаушыға дауыс беру құқығын беретін есептен шығару куәлігін береді.

Есептен шығару куәлігі 2016 жылғы 4 наурыздан бастап 19 наурызда 18.00 сағатқа дейін беріледі.

Егер сайлаушы өзінің сайлау учаскесінде есептен шығару куәлігін ала алмаса (іссапарда жүрсе және т.б.), ол өзінің сенім білдірген адамына сенімхат бойынша куәлікті алуды тапсыра алады. Бұл жағдайда сайлаушының сенім білдірген адамы есептен шығару куәлігін алғаннан кейін оны сайлаушыға өзі береді немесе жібереді.

Дауыс беру құқығын беретін есептен шығару куәлігін ұсынғаннан кейін учаскелік сайлау комиссиясы дауыс беру күні сайлаушыны оның келген жері бойынша сайлау учаскесіндегі сайлаушылар тізіміне енгізеді.

Есептен шығару куәлігі басқа сайлау округінде немесе бір елді мекен аумағындағы басқа сайлау учаскесінде дауыс беруге қатысқысы келген сайлаушыларға берілмейді.

Жоғалған есептен шығару куәліктері қалпына келтірілмейді және олардың көшірме нұсқалары берілмейді.

4 наурыздан барлық сайлаушыларға өзінің сайлау учаскесіндегі сайлаушылар тізімінде өзі туралы деректерді тексеру мүмкіндігі беріледі.

Егер сайлаушы сайлау күні сайлау учаскесіне денсаулық жағдайына байланысты немесе отбасының сырқат мүшесіне күтім жасауына байланысты,  немесе сайлау учаскелері құрылмаған шалғайдағы аудандарда болуына байланысты келе алмайтын болса ол үйде дауыс беруді ұйымдастыру туралы учаскелік сайлау комиссиясына өтініш жасауға құқылы. Мұндай өтініштер 20 наурыз күні сағат 12:00-ге дейін қабылданады.

Қазақстан Республикасы Орталық сайлау комиссиясының 
Баспасөз қызметі 
тел. 75-28-44, 75-23-69