БАСПАСӨЗ РЕЛИЗІ

2016 жылғы 18 ақпанда Орталық сайлау комиссиясында

сайлауға қатысушы саяси партиялардың өкілдерімен сайлау заңнамасының нормаларын сақтау мәселелері жөнінде семинар болды

2016 жылғы 18 ақпанда Орталық сайлау комиссиясында сайлауға қатысушы саяси партиялардың өкілдерімен сайлау заңнамасының нормаларын сақтау мәселелері жөнінде семинар болды.

Семинар жұмысына Қазақстан Республикасы Орталық сайлау комиссиясы Төрағасының орынбасары В.К. Фоос, ҚР ОСК мүшелері М.А. Сәрсембаев, Охлопкова Т.В., Сүлеймен Л.Ж., Қазақстан Республикасы Бас прокуратурасының 1-ші Департаментінің бөлім бастығы С. І. Сәмет, ЕҚЫҰ бағдарламаларының Астанадағы офисінің, Сайлауды бақылау жөніндегі республикалық қоғамдық комиссияның және «Қазақстан заңгерлерінің одағы» республикалық қоғамдық бірлестігінің өкілдері қатысты.

Орталық сайлау комиссиясы Төрағасының орынбасары В.К. Фоос негізгі баяндама жасады.

Атап айтқанда, ол саяси партиялардың өкілдерін электораттық кезеңдегі партиялар қызметіне, олардың сайлауалды үгітті жүзеге асыру тәртібі мен шарттарына қатысты сайлау заңнамасының ережелері туралы ақпараттандырды.

«Сайлауға қатысушылардың барлығы сайлау заңнамасының ережелерін сақтап қана қоймай, сайлауалды үгітті «былғаныш» саясат технологияларын қолданбай,  әділ жүргізуі маңызды» -  деп атап өтті Ортсайлауком Төрағасының орынбасары.

Ортсайлауком мүшесі М.А. Сәрсембаев Қазақстан Республикасы саяси партияларының сайлау науқандарына қатысуына қысқаша шолу жүргізді, сондай-ақ өткен парламенттік сайлаулардың кейбір ерекшеліктерін атап өтті.

Қазақстан Республикасы Бас прокуратурасының 1-ші Департаментінің бөлім бастығы С. І. Сәмет үгіт жүргізу кезеңінде саяси партиялардың қызметін құқықтық реттеу мәселелерін айқындап берді, сондай-ақ аталған мәселе бойынша құқық қолдану тәжірибесі туралы айтты.

Әсіресе, сайлау алдындағы үгітті оған тыйым салынған кезеңде жүргізу әкімшілік жауапкершілікке, партиялық тізімді немесе жекелеген кандидаттарды тіркеуден бас тартуға немесе тіркелгені туралы шешімді жоюға әкеп соқтырады.

Пікір алмасу барысында сайлау заңнамасы нормаларының сақталуын тиімді қамтамасыз етудің, сайлау туралы заңның талаптарын бұзушылықтарды анықтау мен болдырмаудың жолдары мен әдістері қаралды.

Саяси партиялардың өкілдері сайлау органдарымен және сайлау процесіне қатысушылармен өзара іс-қимыл тетіктеріне қатысты өздерінің ұсыныстары мен тілектерін айтты.