20 ақпанда партиялық тізімдер бойынша сайланатын Парламент Мәжілісінің депуаттарын сайлауда сайлауалды үгіт басталды. Ортсайлаукомда болған брифинг барысында ҚР ОСК мүшесі Л.Ж: Сүлеймен атап өткендей, осы сәттен бастап партиялық тізімдер ұсынған саяси партиялардың мақсаттары мен міндеттерін насихаттайтын, жаңалықтар және талдау бағдарламаларынан өзге, бар ақпарат партиялардың сайлау қорынан төленуі тиіс. Жаңалықтар және талдау бағдарламаларын дайындауда партиялар мен кандидаттардың қызметін тең үлесте жариялау жөніндегі талап  сақталуы тиіс.

Сайлау туралы заңға сәйкес сайлау қорларын құрмайтын азаматтар, қоғамдық бірлестіктер қаржыландыруды қажет етпейтін сайлауалды үгіт жүргізуге құқылы.

Сайлауға қатысушы саяси партияларға шарттық негiзде баспасөз бетiнен орын немесе эфир уақытын беруге Орталық сайлау комиссиясының партиялық тізімді тіркегені туралы шешімінің көшірмесі және өкілетті адам қол қойған БАҚ басшысың атына жазбаша өтініш негіз болады. Шарттың талаптары белгiлi бiр партияға артықшылық туғызбауға тиiс, ал  саяси партияның бірiне эфир уақытын, баспасөз бетiнен орын бөлуге берген келiсімi басқа да партияларға эфир уақытын, баспасөз бетiнен орын бөлуге келiсiм беруі болып табылады.

Кандидаттардың телевизия мен радиода сөйлеп жатқан сөздерiн бөлуге және сөйлеген сөздерiне iле-шала, сондай-ақ баспа басылымдарындағы сөздерiне сол нөмiрде түсiнiктеме жасауға тыйым салынады.

Мемлекеттiк органдардың, жергiлiктi өзiн-өзi басқару органдарының, олардың лауазымды адамдарының, Қарулы Күштердiң, басқа да әскерлер мен әскери құралымдардың әскери қызметшiлерiнің, ұлттық қауiпсiздiк органдарының, құқық қорғау органдарының қызметкерлерi мен судьяларының, сайлау комиссияларының мүшелерiнің, діни бiрлестiктердің сайлау алдындағы үгiттi жүргiзуге құқығы жоқ. Шетелдіктердің, азаматтығы жоқ адамдардың, шет елдердiң заңды тұлғалары мен халықаралық ұйымдардың, сондай-ақ үгіт қызметін жүзеге асыруға құқығы жоқ.

Сайлаумен байланысты қоғамдық пікірге сұрау caлу нәтижелерін жариялаған кезде интернет-ресурстар, барлық бұқаралық ақпарат құралдары сияқты, сұрау салуды жүргiзген ұйымды, сұрау салуды жүргізуге тапсырыс берген және оның ақшасын төлеген адамдарды, сұрау салу жүргiзілген уақытты, ақпарат жинау әдiсiн, сұрау салудың нақты тұжырымын, сұралғандардың саны мен сұрау салу нәтижесінің қателiк коэффициентiн көрсетуге мiндеттi. Бұқаралық ақпарат құралдарында қоғамдық пікірге сұрау салу нәтижелерiн, сайлау нәтижелерiнiң болжамын, сайлауға байланысты өзге де зерттеулердi дауыс берiлетін күн алдындағы бес күн ішінде және дауыс берiлетiн күні жариялауға жол берілмейдi. Сондай-ақ сайлау күнi дауыс берілетiн үй-жайда немесе дауыс беру пунктiнде қоғамдық пiкiрге сұрау салуға, сондай-ақ тыйым салынады. 

Сайлау күні және оның алдындағы күнi БАҚ-та үгіт материалдарын жариялауға болмайды. Сайлау комиссияларының үй-жайларынан және дауыс беруге арналған үй-жайлардан тыс жерлерде бұрыннан ілулi тұрған баспа үгiт материалдарын сол орындарында қалдыруға болады.

Үгіттік, оның ішінде интернет желісінде таратылатын материалдардың авторлығын айқындау мүмкіндігі жоқ жағдайда, олар анонимді болып саналады. Анонимдік материалдарды тарату үшін әкімшілік жауапкершілік белгіленген.

Л. Сүлеймен БАҚ өкілдерін «бұқаралық ақпарат құралдарының үгіт жүргізу кезеңіндегі қызметіне қатысты неғұрлым жиі қойылатын сұрақтарына жауаптарды ҚР ОСК өзінің ресми интернет-ресурсында «Сұрақ-жауап» бөлігінде орналасқаны» туралы ақпараттандырды.

«Сайлау туралы заңнама қазір интернет мәселелерін толығымен реттемейтінін бәрі біледі. Мұндай жағдайда сайлау процесіне тартылғандардың барлығының бірыңғай түсінігі мен сындарлы тәсілдемесі болуы маңызды.Сондықтан Ортсайлауком электораттық процестің барлық субъектілерімен (партяилармен, бұқаралық ақпарат құралдарымен, Бас прокуратурамен, ақпарат саласындағы өкілетті органмен) үгіт науқаны заңнаманы бұзушылықтарсыз өтуі үшін, икемді және жедел жауап қату мүмкіндіктерін қарастырады» - деп атап өтті Л. Сүлеймен брифинг соңында.