2011 жылғы 30 наурызда Қазақстан Республикасы Орталық сайлау комиссиясында Қазақстан Республикасы Президентінің кезектен тыс сайлауын байқау жөніндегі ШЫҰ Миссиясының басшысымен кездесу болып өтті
2011 жылғы 30 наурызда Қазақстан Республикасы Орталық сайлау комиссиясының Төрағасы Қ.Т.Тұрғанқұлов Қазақстан Республикасы Президентінің кезектен тыс сайлауын байқау жөніндегі ШЫҰ Миссиясының басшысы, Шанхай Ынтымақтастық Ұйымының Бас хатшысы М.С.Иманалиев мырзамен кездесті. Кездесуге сондай-ақ ШЫҰ Хатшылығының кеңесшісі С.А.Имандосов қатысты.
Кездесу барысында Ортсайлауком Басшысы халықаралық байқаушыларды Орталық сайлау комиссиясының кезектен тыс сайлауды әзірлеу мен өткізу бойынша жұмысымен жан-жақты таныстырып өтті.
«Сайлау науқаны заңмен көзделген тәртіпте, кезең-кезеңімен өтіп келеді. Кандидаттар да сайлауалды үгіт жұмыстарын «лас» технологияларды қолданбай, қарқынды жүргізуде. Қазіргі кезде сайлау комиссиялары дауыс беру күніне әзірлік үстінде. Біз барлық сайлау рәсімдерінің заңмен белгіленген тәртіпте өткізілуін көздейміз»,- деп атап өтті Қуандық Тұрғанқұлов.
Қазақстан Республикасы Президентінің кезектен тыс сайлауын байқау жөніндегі ШЫҰ Миссиясының басшысы, өз кезегінде, ШЫҰ-ның белді мүшесі болып табылатын және биылғы жылы оған Төрағалық етіп отырған Қазақстандағы президенттік сайлауды байқауға ШЫҰ Миссиясы белсенді қатысуды көздеп отырғанын атап өтті.
М.Иманалиев мырза, сондай-ақ, сайлауды әзірлеу барысына, бұқаралық ақпарат құралдарының сайлау науқанындағы жұмысына жоғары баға берді.
«Сайлауға дайындық өте байсалды және мұқият жүргізіліп жатқанына көзіміз жетіп отыр. Өз кезегімізде біздің Миссия сайлауды байқауды қазақстандық заңнама аясында және халықаралық өлшемдер негізінде жүргізетін боламыз»,- дей келе, кездесу соңында М.Иманалиев мырза Орталық сайлау комиссиясы бастаған сайлауды ұйымдастырушыларға табыс тіледі.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44