БАСПАСӨЗ РЕЛИЗІ

10 наурызда ҚР ОСК дауыс беру күні exit poll жүргізу тәртібі туралы, сондай-ақ Қазақстан халқы Ассамблеясы сайлайтын Парламент Мәжілісінің депутаттарын сайлау бойынша дауыс беру тәртібі, орны және уақыты туралы брифинг болды

10 наурызда Орталық сайлау комиссиясында дауыс беру күні exit poll жүргізу тәртібі туралы, сондай-ақ Қазақстан халқы Ассамблеясы сайлайтын Парламент Мәжілісінің депутаттарын сайлау бойынша дауыс беру тәртібі, орны және уақыты туралы брифинг болды.

ҚР ОСК мүшелері Т. Охлопкова мен М. Сәрсембаев Сайлау туралы Қазақстан Республикасы Конституциялық заңының 28-бабы 9-тармағына сәйкес сайлаумен байланысты қоғамдық пікірге сұрау caлу нәтижелерін жариялаған кезде бұқаралық ақпарат құралдары сұрау салуды жүргiзген ұйымды, сұрау салуды жүргізуге тапсырыс берген және оның ақшасын төлеген адамдарды, сұрау салу жүргiзілген уақытты, ақпарат жинау әдiсiн, сұрау салудың нақты тұжырымын, сұралғандардың саны мен сұрау салу нәтижесінің қателiк коэффициентiн көрсетуге мiндеттi екенін атап өтті.

БАҚ-та дауыс беру күні алдындағы бес күн ішінде, яғни 15 наурыздан бастап және дауыс беру күні 20 наурызда қоғамдық пікірге сұрау салу нәтижелерiн, сайлау нәтижелерiнiң болжамын, сайлауға байланысты өзге де зерттеулердi жариялауға жол берілмейді. Сайлау күнi дауыс беруге арналған үй-жайда қоғамдық пiкiрге сұрау салуға тыйым салынады.

Қазақстан халқы Ассамблеясы сайлайтын Парламент Мәжілісінің депутаттарын сайлау бойынша дауыс беруді өткізуге қатысты, ҚР ОСК мүшелері БАҚ өкілдерін Ассамблея Кеңесінің хатына сәйкес Қазақстан халқы Ассамблеясының Сессиясы өзінің жұмысын 21 наурыз күні сағ. 08:00-де бастайтыны туралы ақпараттандырды.

Дауыс беруге арналған пункт Ассамблеяның сессиясы өтетін ғимаратта орналастырылады және Сессия жұмысының басталуынан бір сағат бұрын, яғни сағ. 07:00-де ашылады. Дауыс беруге арналған пунктта ол ашылған сәттен бастап дауыс беру нәтижелері анықталғанға дейін халықаралық және қазақстандық байқаушылар, бұқаралық ақпарат құралдарының өкілдері, сондай-ақ Ассамблея сайлайтын Мәжіліс депутаттығына кандидаттардың сенім білдірілген адамдары қатысуға құқылы.

Ассамблеяның жұмысына оның мүшелерінің жалпы санының үштен екі бөлігі қатысқан жағдайда, ол өткізілген болып есептеледі. Бүгінгі күні Қазақстан халқы Ассамблеясының құрамында 446 мүше бар.

Сессияда Астана қаласының қалалық сайлау комиссиясының төрағасы дауыс беруді өткізу тәртібін түсіндіргеннен кейін Ассамблея мүшелерін дауыс беруге арналған пунктке шақырады.

Сайлау бюллетеніне Мәжіліс депутаттығына тіркелген 9 кандидаттың барлығы енгізіледі. Дауыс беруге арналған сайлау бюллетені Ассамблея мүшесіне сайлаушылар тізімінің негізінде оның жеке басын куәландыратын құжатты ұсынғанда беріледі. Әр сайлаушы жеке өзі дауыс береді.

Дауыс беру және дауыстарды санау аяқталғаннан кейін қалалық сайлау комиссиясы дауыс беру нәтижелері туралы хаттама жасап, қол қояды.

Дауыс беруге қатысқан Ассамблея мүшелерінің 50 пайыздан жоғары дауысын жинаған кандидаттар сайланған болып есептеледі.

Сессия қалалық сайлау комиссиясының төрағасы дауыс беру нәтижелері туралы хаттаманы жария еткеннен соң жабылады.

Қалалық сайлау комиссиясының хаттамасы Ортсайлаукомға сайлау өткен күннен екі күндік мерзімнен, 22 наурыздан кешіктірмей ұсынылады.

Сайланған Мәжіліс депутаттарын тіркеуді Ортсайлауком жүзеге асырады.

Мәжіліс депутаттарын сайлаудың жалпы Республика бойынша қорытындыларын Ортсайлауком 2016 жылғы 27 наурыздан кешіктірмей анықтайды, ал сайлау қорытындылары туралы хабар БАҚ-та 30 наурыздан кешіктірмей жарияланады.