БАСПАСӨЗ РЕЛИЗІ

2016 жылғы 15 наурызда Орталық сайлау комиссиясында кандидаттардың, саяси партиялардың және азаматтардың өтініштерін қарау барысы туралы брифинг болды

2016 жылғы 15 наурызда Орталық сайлау комиссиясында кандидаттардың, саяси партиялардың және азаматтардың өтініштерін қарау барысы туралы брифинг болды.

«Қазақстан Республикасындағы сайлау туралы» Конституциялық заңның 49-бабына сәйкес сайлау комиссиясының және оның мүшелерінің шешімдеріне және іс-әрекеттеріне (әрекетсіздігіне) шағымдарды жоғары тұрған комиссия шағым түскен күннен бастап, егер сайлау туралы заңда өзгеше көзделмесе, үш күн ішінде қарайды.

Азаматтар мен ұйымдардың сайлау заңнамасының бұзылғаны туралы өтініштерін сайлау комиссиялары шағым түскен күннен бастап, егер сайлау туралы заңда өзгеше көзделмеген болса, бес күн ішінде қарайды. 

2016 жылғы 20 қаңтар – 14 наурыз аралығындағы кезеңде Ортсайлаукомға жеке және заңды тұлғалардың 113 өтініші келіп түсті.

Түскен өтініштердің 29-ы (25,7 %) Қазақстан Республикасы Парламенті Мәжілісінің депутаттарын сайлау жөніндегі сайлау науқанымен байланысты. Олардың ішінде: 9 – қоғамдық бірлестіктерден (олардың ішінде саяси партиялардан), 11 – жеке тұлғалардан, 8 – БАҚ-тардан, 1 – облыстық сайлау комиссиясынан.

10 өтініш сайлау заңнамасының жекелеген нормаларын түсіндіруге қатысты; 5 - Парламент депутаттығына дауысқа түсуге ниет білдіру, белгілі бір кандидатты қолдау немесе партиялық тізімдерге енгізу туралы; 1 - Қазақстан халқы Ассамблеясынан депутаттыққа кандидаттың тіркеуін қайтарып алу туралы талаппен; 6 - сайлау комиссиялары мен депутаттыққа кандидаттар туралы ақпарат беру туралы; 1 - сайлау науқаны кезеңіндегі заң бұзушылықтар туралы ақпарат беру туралы; 3 - сайлау процесімен байланысты емес (түрлі әлеуметтік және тұрмыстық мәселелерді шешу туралы).

Өтініш иелеріне жауаптар берілді. Жеті өтініш қарау үшін тиісті органдарға жолданды.

Келіп түскен 84 (74,3 %) өтініш Қазақстан Республикасы мәслихаттарының депутаттарын сайлау жөніндегі сайлау науқанымен байланысты. Олардың ішінде: 58 – жеке тұлғалардан; 8 – БАҚ-тардан; 1 – облыстық мәслихаттан; 8 – қоғамдық бірлестіктерден (олардың ішінде саяси партиялардан); 9 – аумақтық сайлау комиссияларынан.

27 өтініш сайлау заңнамасының жекелеген нормаларын түсіндіруге қатысты; 10 – сайлау комиссиялары, кандидаттар және т.б. туралы ақпарат беру туралы; 4 – сайлауды әзірлеу мен өткізу мәселелері жөнінде ұсыныстар қамтиды; 1 – мүмкіндігі шектеулі адамдарға тең қолжетімділік беру туралы; 2 – әлеуметтік, тұрмыстық және басқа проблемаларға байланысты сайлауға қатысу мүмкіндігінің жоқтығы туралы; 1 – сайлау процесіне қатысы жоқ (тұрмыстық жағдайларын шешу туралы өтініш); 1 – депутаттыққа кандидаттың сайлауалды үгітті жүргізу тәртібін бұзғанына шағым; 9 – сайлау комиссияларының шешімдеріне, іс-әрекеттеріне (әрекетсіздігіне) шағымдар; 2 – мемлекеттік органдардың, сондай-ақ олардың лауазымды адамдарының іс-әрекеттеріне шағым; 11 – депутаттыққа кандидатты тіркеумен келіспеу туралы.

Депутаттыққа кандидаттардың және олардың жұбайларының табысы туралы декларациядағы мәліметтердің дұрыс еместігі және мәслихат депутаттығына сайлану құқығын қалпына келтіру туралы 16 өтініш қарау үшін тиісті органдарға жолданды және бақылауға алынды.