2011 жылғы 21 ақпанда Астана қаласында Қазақстан Республикасы Президентінің кезектен тыс сайлауын әзірлеу мен өткізу сұрақтары бойынша республикалық семинар-кеңес болып өтті
2011 жылғы 21 ақпанда Астана қаласында Қазақстан Республикасы Президентінің кезектен тыс сайлауын әзірлеу мен өткізу сұрақтары бойынша республикалық семинар-кеңес болып өтті.
Семинарға қатысуға облыстық, Астана және Алматы қалалық сайлау комиссияларының төрағалары мен хатшылары, Орталық сайлау комиссиясының өңірлердегі өкілдері, Қазақстан Республикасының саяси партиялары, бұқаралық ақпарат құралдары мен мүдделі мемлекеттік органдарының өкілдері шақырылған.
Семинар-кеңес барысында сайлау науқанын материалдық-техникалық қамтамасыз етуге, сондай-ақ сайлау комиссиялары, жергілікті атқарушы органдар, үкіметтік емес ұйымдар, азаматтық қоғам институттары мен бұқаралық ақпарат құралдары арасындағы тиімді өзара әрекеттестікке қатысты сұрақтар талқыланды.
Сайлау науқанының қазіргі кезеңінде бірлесіп атқарылатын жұмыстың маңызды бағыттарының бірі барлық сайлауға қатысушылардың сайлау заңнамасы нормаларын бұлжытпай орындауын қамтамасыз етуде екенін атап өтті семинар-кеңеске қатысқандар.
Семинар-кеңестің жұмысы барысында қозғалған мейілінше өзекті мәселелер қатарында сайлау процесін құқықтық және құжаттамалық қамтамасыз ету, сайлаушылар тізімдерін жасау, нақтылау және түзету бойынша жұмысты ұйымдастыру, отандық және халықаралық байқаушылардың сайлау комиссияларымен, жергілікті атқарушы органдармен, үкіметтік емес ұйымдармен, азаматтық қоғам институттарымен және бұқаралық ақпарат құралдарымен өзара әрекеттестігін қамтамасыз ету, халықаралық байқаушыларды аккредиттеу және олардың қызметін ұйымдастыру, сайлауды ақпараттық қолдау және сайлауалды үгіт, сайлау комиссияларының қызметі сұрақтарын атауға болады.
Сайлау науқанын қаржыландыру сұрақтарына ерекше назар аударылды. Қазақстан Республикасы Үкіметінің резервінен алдағы Қазақстан Республикасы Президентінің сайлауына барлығы 4 миллиард 706 миллион теңге бөлінген.
2005 жылғы нақтылы шығындармен салыстырғанда қаражат қажеттілігі 1 миллиард 697 миллион теңгеге артқан.
Бұл инфляцияға, сондай-ақ сайлау комиссиялары қызметін қамтамасыз ету бойынша шығындардың артуына байланысты орын алап отыр.
2009 жылы сайлау туралы заңға енгізілген өзгерістерге сәйкес, аумақтық және учаскелік сайлау комиссияларының мемлекеттік қызметшілер болып табылмайтын мүшелеріне кемінде ең төменгі үш жалақы мөлшерінде жалақы белгіленген. Оның сыртында, сайлау комиссиялары мүшелерінің барлығының үстеме жұмысына, мереке және демалыс күндеріндегі жұмысына ақы төлеу көзделген.
Заңның бұл нормасы шығындарды 1 миллиард 681 миллион теңгеге арттырды.
Президенттікке кандидаттардың сайлауалды үгітіне бөлінетін қаржы сомасы 2005 жылмен салыстырғанда 435 400 теңгеге ұлғайған.
Осылайша, егер 2005 жылы бір кандидаттың үгіт шараларына 5 миллионов 858 мың 600 теңге бөлінген болса, биылғы жылы бұл сома 6 миллион 294 мың теңге құрады.
Бұл ретте аталған сомаларды есептеулердің негізіне Қазақстан Республикасы Байланыс және ақпарат министрлігі ұсынған мәліметтер алынды.
Жалпы талқылау барысындағы сындарлы пікір алмасу кеңеске қатысушылардың сайлау үрдісін ұйымдастыру аясында жүргізілетін жұмыстың тиімділігін арттыру жөнінде бірқатар нақтылы ұсыныстар қалыптастыруына мүмкіндік берді.
Аумақтық сайлау комиссияларының өкілдері өз қызметтерінің әртүрлі бағыттары бойынша тәжірибе бөлісіп, семинар-кеңесте талқыланған мәселелер жөнінде пікір алмасты.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44