2011 жылғы 16 ақпанда Орталық сайлау комиссиясында бұқаралық ақпарат құралдарының өкілдерімен сайлау науқанын ақпараттық қолдау және сайлауалды үгіт жұмыстарын жүргізу ережелерін сақтау сұрақтары бойынша мәжіліс болып өтті
2011 жылғы 16 ақпанда Орталық сайлау комиссиясында бұқаралық ақпарат құралдарының өкілдерімен сайлау науқанын ақпараттық қолдау және сайлауалды үгіт жұмыстарын жүргізу ережелерін сақтау сұрақтары бойынша мәжіліс болып өтті.
Кездесу аясында 2011 жылдың 3 сәуіріне тағайындалған Қазақстан Республикасы Президентінің кезектен тыс сайлауы бойынша науқан барысында бұқаралық ақпарат құралдарының барлық деңгейдегі сайлау органдарымен және сайлауға қатысушылармен өзара қарым-қатынасының мәселелері талқыланды.
Орталық сайлау комиссиясы Төрағасының орынбасары В.К.Фоос пен Ортсайлауком мүшесі Л.Ж.Сүлеймен бұқаралық ақпарат құралдары өкілдерін сайлау заңнамасының бұқаралық ақпарат құралдарының электоралдық кезеңдегі қызметін реттеуге қатысты баптары туралы хабардар етті. Бұл ретте келесілер атап өтілді:
• Барлық Қазақстан Республикасы Президенттігіне кандидаттардың үгіт материалдары бұқаралық ақпарат құралдарында 2011 жылғы 3 наурыздан 1 сәуір күнгі сағат 24.00-ге дейін орналастырыла алады;
• Тыйым салынған кезеңде сайлауалды үгіт жүргізу Әкімшілік құқық бұзушылық туралы кодекстың 99-бабы бойынша әкімшілік жауаптылық жүктейді, Қазақстан Республикасы Президенттігіне кандидатты тіркеуден бас тартуға немесе тіркеу туралы шешімнің күшін жоюға әкеледі;
• Мемлекет үміткерлерге өздерінің сайлауалды бағдарламаларымен бұқаралық ақпарат құралдарына шығу үшін тең көлемде қаражат бөлуді кепілдендіреді. Әрбiр кандидаттың телевизиядан он бес минуттық сөз сөйлеуiне, радиодан он минуттық сөз сөйлеуіне, сондай-ақ баспа басылымдарында 0,1 баспа табақтан аспайтын көлемде екi мақала жариялауына қаражат берiледi;
• Бұқаралық ақпарат құралдары тiркелген кандидаттарға эфир уақытын, баспасөз бетiнен орынды шарттық негiзде сайлау қорлары қаражаты есебінен бередi;
• Кандидаттарға эфир уақытын, баспасөз бетiнен орын беру туралы шарттың талаптары белгiлi бiр кандидатқа артықшылық туғызбауға тиiс;
• Кандидаттардың бірiне эфир уақытын, баспасөз бетiнен орын бөлуге берген келiсім басқа да кандидаттарға эфир уақытын, баспасөз бетiнен орын бөлуге келiсiм беруі болып табылады;
• Кандидаттардың бұқаралық ақпарат құралдарына шығуының кезектілігі жазбаша өтініштердің келiп түсу ретiмен не егер өтiнiштер бiр мезгiлде келіп түссе, жеребе бойынша белгiленедi;
• Кандидаттардың телевизия мен радиода сөйлеп жатқан сөздерiн бөлуге және сөйлеген сөздерiне iле-шала, сондай-ақ баспа басылымдарындағы сөздерiне сол нөмiрде түсiнiктеме жасауға тыйым салынады;
• Бұқаралық ақпарат құралдары барлық кандидаттарды ұсыну, оларды сайлау комиссияларының тіркеуі жөніндегі іс-шаралар туралы ақпаратты баспасөз бетінен орын, эфир уақытының көлемі бойынша бірдей таратуға міндетті;
• Бұқаралық ақпарат құралдарының редакциялары кандидаттардың сайлау науқанын объективтi көрсетудi жүзеге асырады; кандидаттың ар-намысына, қадiр-қасиетiне және iскерлiк беделiне көрiнеу нұқсан келтiретiн үгiт материалдары мен өзге де ақпаратты жариялаудан аулақ болады; аталған тұлғалардан өтiнiш келiп түскеннен кейін баспа басылымының таяудағы нөмірінде сол бетте, сондай көлемде және сол қаріппен немесе теледидар не радио хабарларында жиырма төрт сағат iшiнде сондай уақытта аталған адамдарға ар-намысын, қадiр-қасиетін және iскерлiк беделін қорғауы үшiн терiске шығаруды тегiн жариялауына мүмкiндiк береді;
• Кандидат болып тіркелген журналистер, редакциялардың лауазымды адамдары немесе олардың сенім білдірілген адамдары сайлауды бұқаралық ақпарат құралдары арқылы жариялауға қатыспайды;
• Сайлауалды үгіт жүргізуге кедергі келтіргені және бұқаралық ақпарат құралдары арқылы сайлауалды үгіт жүргізу шарттарын бұзғаны үшін әкімшілік жауапкершілік белгіленген.
Мәжілістегі пікір алмасу барысында сайлау заңнамасы нормаларын сақтаудың, сайлау науқанын бұқаралық ақпарат құралдарында жариялау немесе сайлауалды үгіт жүргізу кезінде сайлау туралы заң талаптарының бұзылуын анықтаудың жолдары мен әдістері нақтылы мысалдар негізінде қарастырылды.
Бұқаралық ақпарат құралдарының өкілдері БАҚ-тардың сайлау органдарымен және сайлауға қатысушылармен өзара қарым-қатынасын жолға қою тетіктеріне қатысты өз пікірлерін айтты, сайлау заңнамасының сайлауалды үгіт жұмыстарын жүргізу тәртібін реттейтін ережелерін іске асыру тәсілдерін талқылады.



Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44