Қазақстан Республикасы Орталық сайлау комиссиясы аумақтық сайлау комиссияларының қол қою парақтарын тексеру мерзімін қысқату туралы шешім қабылдады
2011 жылғы 10 ақпанда Қазақстан Республикасы Орталық сайлау комиссиясының отырысы болып, онда аумақтық сайлау комиссияларының Президенттікке кандидаттарды қолдап қол қою парақтарын тексеру мерзімін он күнтізбелік күннен бес күнтізбелік күнге дейін және Ортсайлаукомның, Конституция мен «Қазақстан Республикасындағы сайлау туралы» Конституциялық заңда белгіленген талаптарға сәйкестігі анықталған соң, кандидаттарға қол қою парақтарын беру мерзімін бес күннен екі күнге дейін қысқату туралы шешім қабылданды.
Отырыстан соң болған брифингте Ортсайлауком Басшысы түсіндіріп өткендей, «кандидаттардан мейілінше ұтқырлық пен жинақылықты талап ететін бұл жағдайда сайлау комиссиялары үшін де сайлау рәсімдері уақытын қысқартқан әділ болар еді. Оның үстіне сайлау рәсімдері уақытын қысқарту есебінен біз кандидаттар үшін уақыт ресурсын көбейтеміз.
Ендеше, Ортсайлауком шешімді тек кандидаттардың мүддесін ескере отырып қабылдады деуге болады. Әрине, аумақтық сайлау комиссияларының да, біздің де жұмысымыз қауырт болады. Бірақ біз бұған дайынбыз».
Сол күні лингвистикалық комиссияның 2011 жылғы 9 ақпандағы шешімі негізінде Орталық сайлау комиссиясы Қазақстан Республикасы Президенттігіне кандидат Мұсағали Сәрсенбайұлы Дуамбековтың Конституция мен «Қазақстан Республикасындағы сайлау туралы» Конституциялық заңда белгіленген талаптарға сәйкес келетіні туралы қаулы қабылдады.
Ортсайлаукомның сайлау рәсімдерін қысқарту туралы қабылдаған шешіміне сәйкес, Президенттікке кандидат Мұсағали Сәрсенбайұлы Дуамбековке екі күн ішінде 100 мың қол жинауға жететіндей 5 мың дана қол қою парақтары берілетін болады. Содан кейін кандидат өзін қолдап қол жинауға кірісе алады.
Ортсайлауком Президенттікке кандидаттарға аумақтық сайлау комиссияларына қол қою парақтарын 26 ақпаннан кешіктірмей тапсыруды ұсынып отыр, сонда сайлау комиссиялары азаматтардың қолының растығын бес күн ішінде тексеруге мүмкіндік алатын болады.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44