Алдағы бес жылға Қазақстан Республикасы Орталық сайлау комиссиясының құрамы қалыптастырылды
Ағымдағы жылдың сәуір айында Қазақстан Республикасы Орталық сайлау комиссиясы мүшелерінің өкілеттік мерзімінің аяқталуына байланысты, Конституцияға және Қазақстан Республикасының «Қазақстан Республикасындағы сайлау туралы» Конституциялық заңына сәйкес жаңа бес жылдық мерзімге Қазақстан Республикасы Орталық сайлау комиссиясының жаңа құрамы қалыптастырылды.
Қазақстан Республикасы Конституциясының 44-бабы 7-тармағына сәйкес, Елбасының 2010 жылғы 9 сәуірдегі Жарлығымен Тұрғанқұлов Қуандық Тұрғанқұлұлы Қазақстан Республикасы Орталық сайлау комиссиясының Төрағасы болып тағайындалды. Сондай-ақ, Қазақстан Республикасы Президентінің Жарлықтарымен Үсен Жетенұлы Жетенов пен Татьяна Витальевна Охлопкова Қазақстан Республикасы Орталық сайлау комиссиясының мүшесі лауазымына тағайындалды.
Сол күні Қазақстан Республикасы Конституциясының 57-бабы 1-тармағына сәйкес, Парламент Сенатының пленарлық отырысында Ләззәт Жаңылысқызы Сүлеймен мен Бақыт Сәрсенбайұлы Мелдешовты Қазақстан Республикасы Орталық сайлау комиссиясының мүшесі лауазымына тағайындау туралы сұрақ қаралды. Сенат депутаттары палата Төрағасы Қасым-Жомарт Тоқаев ұсынған кандидатураларды қолдап бірауыздан дауыс берді.
14 сәуір күні Парламен Мәжілісінің пленарлық отырысында палата Төрағасы Орал Мұхамеджановтың ұсынысы бойынша Владимир Карлович Фоос пен Марат Алданғорұлы Сәрсембаев Қазақстан Республикасы Орталық сайлау комиссиясының мүшесі лауазымына тағайындалды.
Заңнамаға сәйкес Ортсайлаукомның жаңа құрамының бірінші отырысын Төраға ол қалыптастырылғаннан кейінгі он төрт күн ішінде шақырады. Төрағаның орынбасары мен Орталық сайлау комиссиясының хатшысы комиссияның алғашқы отырысында сайланады.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44