2009 жылғы 11 қарашада Қазақстан Республикасы Орталық сайлау комиссиясының Төрағасы Қ.Тұрғанқұловтың ЕҚЫҰ Парламенттік Ассамблеясының Төрағасы Жоау Соарешпен кездесуі болды
2009 жылғы 11 қарашада Қазақстан Республикасы Орталық сайлау комиссиясының Төрағасы Қ.Тұрғанқұловтың ЕҚЫҰ Парламенттік Ассамблеясының Төрағасы Жоау Соарешпен кездесуі болды.
Кездесуге сондай-ақ ЕҚЫҰ Парламенттік Ассамблеясының Бас хатшысы Спенсер Оливер, ЕҚЫҰ Орталығының Астанадағы Басшысы А. Кельчевский, Қазақстан Республикасы Парламенті Сенатының депутаты А. Ахметов, Орталық сайлау комиссиясының мүшелері мен ЕҚЫҰ ПА аппаратының қызметкерлері қатысты.
Кездесу барысында сайлау заңнамасын дамыту мен жетілдіру, Қазақстан Республикасындағы сайлау процесін демократияландыру, сондай-ақ ЕҚЫҰ Парламенттік Ассамблеясы өкілдерінің 2010 жылы ЕҚЫҰ кеңістігіндегі сайлауды байқауға қатысуы саласында Орталық сайлау комиссиясының ЕҚЫҰ мекемелерімен ынтымақтастығын және өзара іс-қимылын одан әрі жалғастыру мәселелері талқыланды.
Ортсайлауком басшысы «ЕҚЫҰ Парламенттік Ассамблеясы ЕҚЫҰ кеңістігіндегі демократияландыру процесі және демократиялық сайлау саласындағы міндеттемелердің орындалуы үшін көп шара атқаруда. Тұтастай барлық соңғы жыл сайынғы сессияларда сайлау өткізу және халықаралық мониторинг жүргізу саласындағы жұмысты жетілдіру жөніндегі ұсынымдарды қамтитын декларациялар мен қарарлар қабылдады» деп атап көрсетті.
Қ. Тұрғанқұлов 2010 жылы Төраға лауазымын атқара отырып, Қазақстан ЕҚЫҰ Парламенттік Ассамблеясына сайлауды байқауды жүзеге асыру кезінде жан-жақты қолдау көрсететінін атап көрсетті. Сондай-ақ Орталық сайлау комиссиясы 2010 жылғы шілдеде «ЕҚЫҰ кеңістігінде электрондық дауыс беруді қолданудың қазіргі жай-күйі мен болашағы» атты семинарды ұйымдастыру туралы ұсыныс жасады.
Соареш мырза өз тарапынан ЕҚЫҰ ПА мен Қазақстан Республикасы Орталық сайлау комиссиясы арасында сайлау процесін жетілдіру мен сайлауды байқауды ұйымдастыру мәселелері жөніндегі қатынастардың дамуындағы оң үрдістерді атап көрсетті, сондай-ақ «Қазақстан өзінің төрағалық міндеттерін білікті орындайды» деген сенімін білдірді.
Кездесу барысында тараптар сондай-ақ Қазақстан Республикасының саяси және сайлау жүйелерін одан әрі демократиялық дамытуға қатысты бірқатар мәселелерді талқылады.
«Алдымыздағы 2010 жылы Қазақстан Республикасы Орталық сайлау комиссиясы мен ЕҚЫҰ Парламенттік Ассамблеясы арасында сайлау мәселелері бойынша жемісті ынтымақтастық боларына біз сенімдіміз» - деп ҚР ОСК Төрағасы кездесу соңын қорытты.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44