2007 жылғы 17 қазан күні Қазақстан Республикасы Орталық сайлау комиссиясының Төрағасы Қуандық Тұрғанқұлов Америка Құрама Штаттарының ЕҚЫҰ жанындағы Тұрақты Өкілі, Елші Джули Финли ханымды оның өтініші бойынша қабылдады. Сондай-ақ, кездесуге Америка Құрама Штаттарының Қазақстан Республикасындағы елшісі Джон Ордвэй мен елшіліктің жауапты қызметкерлері қатысты.
Кездесу барысында Қуандық Тұрғанқұлов пен Джули Финли Қазақстан Республикасы Парламенті Мәжілісі депутаттарының кезектен тыс сайлауы нәтижелері жайында, сондай-ақ қазақстандық сайлау туралы заңнаманы одан әрі жетілдіру бойынша жүргізіліп жатқан жұмыс жайында пікір алмасты.
«Сайлау заңнамасына өзгерістер мен толықтырулар енгізу бойынша заң жобасын әзірлеу барысында Орталық сайлау комиссиясы халықаралық ұйымдардың, соның ішінде ЕҚЫҰ/ДИАҚБ-ның ұсыныстарын, сондай-ақ Қазақстанның үкіметтік емес ұйымдары мен саяси партияларынан, басқа да сайлауға қатысушылардан түскен ұсыныстарды ескеріп отырады. Қазір де осындай ұсыныстар пакеті әзірленіп жатыр, ЕҚЫҰ/ДИАҚБ-ның парламенттік сайлауды байқау нәтижелері бойынша Қорытынды есебі келіп түскеннен кейін, онда айтылған ескертулер мен ұсыныстар да назарға алынатын болады»,- деп атап өтті Орталық сайлау комиссиясының Төрағасы.
Кездесу соңында Д. Финли ханым Қазақстан Республикасының демократиялық, ашық сайлау өткізудегі тәжірибесіне оң баға берді.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44