2019 жылғы 22 қаңтарда ҚР ОСК мүшесі Бахыт Мелдешов ҚР Жоғарғы сотының жанындағы Сот төрелігі академиясында дәріс оқыды

2019 жылғы 22 қаңтарда Қазақстан Республикасы Орталық сайлау комиссиясының мүшесі Бахыт Мелдешов Ортсайлаукомның Қазақстан Республикасы Жоғарғы сотының жанындағы Сот төрелігі академиясымен өзара іс-қимыл аясында азаматтық істерді қарайтын аудандық және оған теңестірілген соттар судьяларының алдында «Қазақстан Республикасының сайлау жүйесінің сайлау заңнамасына енгізілген өзгерістер аясында дамуы» тақырыбында дәріс оқыды.

Іс-шараны Академияның Судьяларды және сот жүйесі қызметкерлерін қайта даярлау, біліктілігін арттыру институты азаматтық істерді қарайтын аудандық және оған теңестірілген соттар судьяларының курстарында ұйымдастырды.

Дәріс барысында сайлау жүйесінің қалыптасу және даму кезеңдері, сайлау құқығы саласындағы халықаралық ұйымдардың ұсынымдары, сонымен қатар 2018 жылғы 29 маусымда қабылданған «Қазақстан Республикасындағы сайлау туралы» Қазақстан Республикасы Конституциялық заңға түзетулер талқыланды.

Дәріске қатысқан республиканың барлық өңірлерінен келген соттар талқыланған тақырыпқа белсенді қызығушылық танытты. Соңында пікір алмасу өтті.