Дания Мәдиқызы Еспаеваны Қазақстан Республикасының Президенттігіне кандидат ретінде тіркеу туралы

2019 жылғы 4 мамырда Қазақстан Республикасы Орталық сайлау комиссиясының отырысы өтті, оған бірқатар саяси партиялар мен мемлекеттік органдардың өкілдері қатысты. Отырыста мына қаулының жобасы қаралды:

1. 2019 жылғы 9 маусымға тағайындалған Қазақстан Республикасы Президентінің кезектен тыс сайлауында Дания Мәдиқызы Еспаеваны Қазақстан Республикасының Президенттігіне кандидат ретінде тіркеу туралы.

Қаулы жобасы туралы Қазақстан Республикасы Орталық сайлау комиссиясының мүшесі Зәуреш Хамитқызы Баймолдина баяндама жасады.

2019 жылғы 25 сәуірде Қазақстанның «Ақ жол» Демократиялық партиясы» қоғамдық бірлестігі Орталық сайлау комиссиясына Қазақстан Республикасының Президенттігіне кандидат ретінде Дания Мәдиқызы Еспаеваның құжаттарын ұсынды. Атап айтқанда:

- Қазақстанның «Ақ жол» Демократиялық партиясы» қоғамдық бірлестігін Әділет министрлігінде тіркеу туралы құжаттың көшірмесі қоса тіркелген, осы қоғамдық бірлестіктің жоғарғы органы отырысының Дания Мәдиқызы Еспаеваны Қазақстан Республикасының Президенттігіне кандидат ретінде ұсыну туралы хаттамасынан үзінді;

- Дания Мәдиқызы Еспаеваның Президенттікке кандидат болып дауысқа түсуге келісім беру жөніндегі өтініші;

- өмірбаяндық деректер;

- сайлау жарнасын енгізгенін куәландыратын құжат.

Осы құжаттардың, сондай-ақ кандидаттың мемлекеттік тілді еркін меңгергендігін анықтау негізінде Орталық сайлау комиссиясының 2019 жылғы 27 сәуірдегі № 19/252 қаулысымен Президенттікке кандидат Дания Мәдиқызы Еспаеваның Конституция мен «Қазақстан Республикасындағы сайлау туралы» Конституциялық заңның талаптарына сәйкестігі анықталды және азаматтардың қолдарын жинау үшін қол қою парақтары берілді.

Орталық сайлау комиссиясына кандидатты тіркеу үшін мынадай құжаттар:

- Президенттікке кандидат Дания Мәдиқызы Еспаеваның кірістері мен мүлкi туралы декларация тапсырғаны туралы мемлекеттік кірістер органының анықтамасы;

- Президенттікке кандидат Дания Мәдиқызы Еспаевада оны тіркеуге кедергі келтіретін аурулардың жоқтығы туралы медициналық қорытынды;

- облыстық, Нұр-Сұлтан, Алматы және Шымкент қалалық сайлау комиссияларының Президенттікке кандидат Дания Мәдиқызы Еспаеваны қолдайтын азаматтардың қолдарын тексеру нәтижелері туралы хаттамалары ұсынылды.

Осы хаттамаларға сәйкес Президенттікке кандидат Дания Мәдиқызы Еспаеваны қолдап Қазақстанның барлық 17 өңірінен оны Президенттікке кандидат ретінде қолдайтын 144 098 азаматтың қолын жинаған, олардың ішінде 139 541 қол рас болып танылды.

Бұл ретте Орталық сайлау комиссиясының 2019 жылғы 15 сәуірдегі №13/237 қаулысымен белгіленген Қазақстан Республикасының Президенттігіне кандидатты қолдайтын рас қолдардың қажетті саны кемінде 118 140 қолды құрайды.

Дания Мәдиқызы Еспаеваны Президенттікке кандидат ретінде тіркеуге қажетті барлық құжаттар Орталық сайлау комиссиясына ұсынылды және оларға қойылатын талаптарға толық сәйкес келеді.

Жоғарыда баяндалғанның негізінде «2019 жылғы 9 маусымға тағайындалған Қазақстан Республикасы Президентінің кезектен тыс сайлауында Дания Мәдиқызы Еспаеваны Қазақстан Республикасы Президенттігіне кандидат ретінде тіркеу туралы» қаулы қабылданды.

Қаулымен төмендегілер белгіленді:

- 2019 жылғы 9 маусымға тағайындалған Қазақстан Республикасы Президентінің кезектен тыс сайлауында Дания Мәдиқызы Еспаева Қазақстан Республикасы Президенттігіне кандидат ретінде тіркелсін;

- Президенттікке кандидат Дания Мәдиқызы Еспаеваға тиісті куәлік берілсін;

- Президенттікке кандидат Дания Мәдиқызы Еспаеваның тіркелгені туралы мәліметтер арнаулы уақытша шот ашу үшін «Қазақстан Халық жинақ банкі» акционерлік қоғамына берілсін;

- бұқаралық ақпарат құралдарында Қазақстан Республикасының Президенттігіне кандидат Дания Мәдиқызы Еспаеваның тіркелгені туралы хабар жариялансын.