Қазақстан Республикасы Конституциясының 44-бабының 2) тармақшасына, 63-бабының 1-тармағына, «Қазақстан Республикасындағы сайлау туралы» Қазақстан Республикасы Конституциялық заңының 85, 87-баптарына сәйкес Қазақстан Республикасы Президентінің 2007 жылғы 20 маусымдағы Жарлығымен 2007 жылғы 18 тамызға Қазақстан Республикасы Парламенті Мәжілісінің партиялық тізімдер негізінде сайланатын депутаттарының кезектен тыс сайлауы, ал 20 тамызға Қазақстан Республикасы Парламенті Мәжілісінің Қазақстан халқы Ассамблеясы сайлайтын депутаттарының кезектен тыс сайлауы тағайындалды.
2007 жылғы 21 маусымда Қазақстан Республикасы Орталық сайлау комиссиясының отырысы болды, онда Қазақстан Республикасы мәслихаттары депутаттарының кезекті сайлауын 2007 жылғы 18 тамызға тағайындау туралы қаулы қабылданды, сондай-ақ Парламент Мәжілісінің партиялық тізімдер негізінде сайланатын депутаттарының кезектен тыс сайлауын әзірлеу мен өткізу жөніндегі негізгі іс-шаралардың күнтізбелік жоспары, Парламент Мәжілісінің Қазақстан халқы Ассамблеясы сайлайтын депутаттарының кезектен тыс сайлауын әзірлеу мен өткізу жөніндегі негізгі іс-шаралардың күнтізбелік жоспары, Қазақстан Республикасы мәслихаттары депутаттарының кезекті сайлауын әзірлеу мен өткізу жөніндегі негізгі іс-шаралардың күнтізбелік жоспары бекітілді.
Мемлекет басшысының Жарлығына және Парламент Мәжілісінің партиялық тізімдер негізінде сайланатын депутаттарының кезектен тыс сайлауын әзірлеу мен өткізу жөніндегі негізгі іс-шаралардың күнтізбелік жоспарына сәйкес кандидаттарды ұсыну 2007 жылғы 22 маусымда басталып, 11 шілдеде аяқталады.
Партиялық тізімдерді тіркеу 2007 жылғы 22 маусым мен 17 шілде аралығындағы кезеңде, ал сайлау алдындағы үгіт 18 шілдеден бастап 16 тамыз күнгі сағат 24-ке дейінгі кезеңде өткізілетін болады.
Парламент Мәжілісінің Қазақстан халқы Ассамблеясы сайлайтын депутаттарының кезектен тыс сайлауын әзірлеу мен өткізу жөніндегі негізгі іс-шаралардың күнтізбелік жоспарына сәйкес Парламент Мәжілісінің Қазақстан халқы Ассамблеясы сайлайтын депутаттығына кандидаттарды ұсыну 2007 жылғы 4 тамызда басталып, 9 тамызда аяқталады.
Қазақстан халқы Ассамблеясы ұсынған кандидаттарды тіркеу 2007 жылғы 9-14 тамыз аралығындағы кезеңде, ал сайлау алдындағы үгіт 2007 жылғы 15 тамызда басталып, 18 тамыз күнгі сағат 24-ке дейін өткізілетін болады.
Қазақстан Республикасы мәслихаттары депутаттарының кезекті сайлауын әзірлеу мен өткізу жөніндегі негізгі іс-шаралардың күнтізбелік жоспарына сай мәслихаттардың депутаттығына кандидаттарды ұсыну 2007 жылғы 22 маусымда басталып, 17 шілдеде аяқталады.
Мәслихаттардың депутаттығына кандидаттарды тіркеу - 2007 жылғы 22 маусым мен 23 шілде аралығындағы кезеңде, ал сайлау алдындағы үгіт 24 шілдеден бастап 16 тамыз күнгі сағат 24-ке дейінгі кезеңде өткізілетін болады.
Қазіргі уақытта Ортсайлауком алдағы сайлау науқандарын өткізуге қажетті барлық ұйымдастырушылық, кадрлық және материалдық ресурстарға ие. Үкімет Мәжіліс депутаттарының кезектен тыс сайлауын қаржыландыру мәселелерін шешуде. Барлық деңгейдегі сайлау комиссияларының құрамдары толығымен жинақталды әрі жұмысқа дайын.
Сайлау науқаны барысында «Қазақстан Республикасындағы сайлау туралы» Қазақстан Республикасы Конституциялық заңы талаптарының сақталуына, сондай-ақ партиялық тізімдерді ұсынған саяси партиялар мен кандидаттардың барлығының бұқаралық ақпарат құралдарына тең қол жеткізуін қамтамасыз етуге ерекше көңіл бөлінетін болады.
Сайлау науқанының барысы, барлық деңгейдегі сайлау комиссияларының қызметі туралы жұртшылықты барынша толық және жан-жақты хабардар ету, Ортсайлаукомның бұқаралық ақпарат құралдарымен тиімді өзара іс-қимыл жасауын ұйымдастыру, оның қызметінің және сайлау процесінің барлық кезеңдерінде оның ашықтығын арттыру, сайлау заңнамасының ережелерін түсіндіру мақсатында Ортсайлаукомда баспасөз орталығы ашылатын болады.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44