2005 жылғы 4 желтоқсанда Қазақстан Республикасы Президентінің кезекті сайлауы өтті.
Дауыс беру 9 580 сайлау учаскелерінде өтті. Облыстардың, Астана мен Алматы қаласы сайлау комиссияларының берген мәліметтеріне сәйкес сайлаушылар тізімдеріне енгізілген 8 млн. 880 мыңнан астам сайлаушының дауыс беруге 6 млн. 850 мыңы немесе 77 пайыздан астамы қатысты.
1447 сайлау учаскесінде сайлаушыларға дауыс беру тәсілін (электрондық сайлау жүйесінің көмегімен не қағаз бюллетеньдер арқылы) таңдау мүмкіндігі ұсынылды.
Дауыс беру күні сайлау учаскелерінде Қазақстан Республикасы Президенттігіне кандидаттардың 11 мыңнан астам сенім білдірілген адамдары; 1 мыңнан аса шет мемлекеттердің, халықаралық ұйымдардың байқаушылары мен шетелдік бұқаралық ақпарат құралдарының өкілдері; 16,5 мың саяси партиялардың, 5600-ден астам қоғамдық бірлестіктердің байқаушылары; 500-дей Қазақстан Республикасы бұқаралық ақпарат құралдарының өкілдері болды.
Сайлау бюллетеніне Қазақстан Республикасы Президенттігіне кандидат болып тіркелген бес кандидаттың тегі енгізілді.
Орталық сайлау комиссиясына 9580 сайлау учаскелерінің 9546-сы бойынша мәліметтер келіп түсті.
Осы мәліметтер бойынша сайлаушылардың дауыстары былай бөлінген:
Ерасыл Әбілқасымұлы Әбілқасымовқа берілген сайлаушылар дауысы - 25330 немесе 0,38 %.
Байменов Алихан Мұхамедияұлына берілген сайлаушылар дауысы - 110462 немесе 1,65%.
Елеусізов Мэлс Хамзаұлына берілген сайлаушылар дауысы - 21674 немесе 0,32 %.
Назарбаев Нұрсұлтан Әбішұлына берілген сайлаушылар дауысы – 6100694 немесе 91,01%.
Тұяқбай Жармахан Айтбайұлына берілген сайлаушылар дауысы 445047 немесе 6,64 %.
Қазіргі уақытқа барлық саны 8 мың сайлаушысы бар 34 шет елдерде орналасқан сайлау учаскелерінен мәліметтер келіп түскен жоқ.