ҚР ОСК-да ЕҚЫҰ/ДИАҚБ Сайлауды байқау жөніндегі Шектеулі миссиясының байқаушыларымен кездесу өтті

2020 жылғы 8 желтоқсанда Қазақстан Республикасы Орталық сайлау комиссиясы мүшелерінің ЕҚЫҰ/ДИАҚБ Сайлауды байқау жөніндегі Шектеулі миссиясымен кездесуі өтті.

Қазақстан Республикасы Орталық сайлау комиссиясының Төрағасы Берік Имашев жақында Нұр-Сұлтан қаласына келген ЕҚЫҰ/ДИАҚБ Сайлауды байқау жөніндегі Шектеулі миссиясының мүшелерін қарсы алды.

ОСК Төрағасы Миссия мүшелерін сайлаудың жарияланғанынан бастап дауыс беру күніне дейінгі науқанының негізгі кезеңдерімен қысқаша таныстырды.

Миссияның басшысы, Елші Ярослав Марчин Домански қазақстандық тарапқа қабылдағаны үшін алғысын білдіріп, Миссияның Негізгі тобының мүшелерімен таныстырды.

Тараптар бүкіл сайлау кезеңінде белсенді өзара іс-қимыл жасау туралы уағдаласты.

Кездесу соңында тараптар дәстүрлі түрде қалыптасқан ынтымақтастық пен ізгі ниет қатынастары 2021 жылы Қазақстан Республикасы Парламенті Мәжілісінің депутаттарын сайлау кезінде өз дамуын табатынына сенім білдірді.