2022 жылғы 10-11 наурыз аралығында Ортсайлауком Төрағасы
Нұрлан Әбдіров жұмыс сапарымен Ақмола облысында болды

Ақмола облысына жұмыс сапары аясында Ортсайлауком Төрағасы Нұрлан Әбдіров өңір жұртшылығымен сайлау процесі мәселелері бойынша бірқатар кездесулер өткізді.

2022 жылғы 10 наурызда ОСК басшысы Ақкөл ауданына барып, Домбыралы ауылының тұрғындарымен кездесті, сондай-ақ 2021 жылғы 25 шілдеде сайланған Кеңес ауылдық округі әкімінің осы елді мекенді дамыту бойынша атқарып отырған жұмыстарымен танысты. Ауыл тұрғындары өздері сайлаған әкімнің қызметіне оң бағаларын берді.

2022 жылғы 11 наурызда Нұрлан Әбдіров саяси партиялардың, ҮЕҰ, БАҚ өкілдерімен, қоғамдық пікір жетекшілерімен, блогерлермен, облыстағы сайлау комиссияларының мүшелерімен кездесті. Іс-шараға 270 адам қатысты.

Нұрлан Әбдіров «Бүгінде Қазақстан өз дамуының жаңа кезеңіне аяқ басты. Біздің мақсатымыз – қажетті реформаларды сапалы түрде жүргізу. Осы тұрғыда, сайлау процесі демократиялық мемлекеттегі шешуші процесс. Сондықтан да оны барынша ашық және жариялы ету үшін біз әрбір қазақстандықтың пікірін тыңдауымыз қажет» - деп атап өтті.

Іс-шарада сайлау заңнамасын, сондай-ақ сайлау жүйесі мен сайлау процестерін реформалау және жетілдіру мәселелері талқыланды.

Кездесуге қатысушылар Мәжіліс пен мәслихаттардың депутаттарын сайлауды өткізу кезінде мажоритарлық және аралас сайлау жүйесін енгізуді, партиялық тізім бойынша әйелдерге арналған квотаны ұлғайтуды ұсынды.

Сондай-ақ, алдағы уақыттарда сайлау науқандары кезінде электрондық дауыс беруді енгізу, сайлаушылардың электоралдық белсенділігі, сондай-ақ олардың өз таңдауына деген жауапкершіліктері жөнінде пікірталас өтті.

ҮЕҰ өкілдері сайлау органдарының ұлттық байқаушылармен жүйелі жұмысының, олардың сайлау мәдениетін арттырудың маңыздылығы туралы мәселені көтерді. ОСК Төрағасы қоғам тарапынан көтерілген ұсыныстарды қолдай отырып, ұлттық байқаушыларды ғана емес, сайлау процесіне қатысушылардың барлық санаттарының сайлау мәдениетін арттыру қажеттігін және бұл Ортсайлауком қызметінің негізгі бағыттарының бірі болып табылатынын атап өтті.

Сондай-ақ, кездесуге қатысушылар ауыл әкімдерін сайлау институтын енгізу және осы сайланбалы қызмет кандидаттарына қатысты заңнама талаптары жөнінде пікір алмасты. Нұрлан Әбдіров ауыл әкімі – ауыл өмірінің барлық саласына жауап беретінін, «халық үніне құлақ асатын мемлекеттің» ең бастапқы сатысында тұрғанын және әкімнің қолынан барлығы келуі қажет екенін атап өтті.

Осы күні Ортсайлауком басшысы Ш. Уәлиханов атындағы Көкшетау мемлекеттік университетінде Ақмола облысы жоғары оқу орындарының студент жастарымен кездесті. Іс-шараға 150 адам қатысты.

Кездесуде электрондық дауыс беруді енгізу, жастардың сайлау институтына сенімін арттыру, партиялық тізім бойынша жастар квотасы, ұлттық сайлау жүйесінің ерекшеліктері, Ортсайлауком қызметі, қазақстандықтардың шет мемлекеттердегі сайлауды халықаралық байқауға қатысуы туралы мәселелер талқыланды.

Жалпы, кездесу барысында жастар арасында құқықтық сауаттылық пен сайлау белсенділігін арттыру, сондай-ақ сайлау процесінің басқа да өзекті мәселелері бойынша сындарлы пікірталас өтті.

ОСК Төрағасы: «Бүгінгі таңда болашақ жастардың қолында деп нық сеніммен айтуға болады, «Жаңа Қазақстанды» құратын буын дәл осы жастардың өздері. Баршаға белгілі, сайлау арқылы ел тағдырына, сонымен бірге Сіздердің әрбіріңіздің тағдырыңызға әсер ететін көптеген мәселелер шешіледі. Бұл дегеніміз Президент сайлауы, Мәжіліс пен мәслихаттардың депутаттарын сайлау, әрине, сонымен бірге әкімдердің сайлауы. Яғни, жастар саяси процестерге ұмтылуы қажет. Сонымен қатар, жастар өз болашағын Қазақстанда өтіп отырған сайлаулардың ашық әрі әділетті жолы арқылы қалыптастыра алатынын терең ұғынуы тиіс» - деп атап өтті.

Кездесу қорытындысы бойынша ОСК Төрағасы өңір жастарына ашық, мазмұнды және тартымды диалог үшін өз алғысын білдірді.

Ортсайлауком Төрағасының Ақмола облысының жұртшылығымен өткен кездесулерінің барлығы басқа өңірлерде көрсетілгендей, осы облыстың өңірлік коммуникациялар қызметінің Instagram әлеуметтік желісіндегі ресми парақшасында https://instagram.com/rsk_akmola?utm_medium=copy_link онлайн режимде көрсетілді.