Ортсайлауком Алматы облысынан Қазақстан Республикасы Парламенті Сенатының шығып қалған депутатының орнына 2022 жылғы 22 сәуірде болған сайлаудың қорытындыларын белгіледі

Ү.ж. 26 сәуірде Нұрлан Әбдіровтың төрағалығымен Орталық сайлау комиссиясының отырысы өтті.

Бейнеконференцбайланыс режиміндегі отырысқа Алматы облыстық сайлау комиссиясының төрағасы Тимур Дәуітов қатысты.

Сайлау қорытындылары туралы ОСК Төрағасының орынбасары Константин Петров баяндама жасады.

Баяндамашының айтуынша, дауыс беруге Алматы облысы мәслихаттарының 358 депутатынан 346 депутат (96,64%) қатысты. Сенат депутаттығына 2 кандидат дауысқа түсті.

Сайлау күні Ортсайлаукомның интернет-ресурсы арқылы таңдаушыларды тіркеуді және дауыс берудің алдын ала қорытындыларын шығаруды онлайн байқау сервистері жұмыс істеді. Осылайша, сайлау процесінің ашықтығы мен жариялылығы қамтамасыз етілді. Бұл процесс ҚР ОСК ақпараттық арналары арқылы жедел жарияланды.

Орталық сайлау комиссиясы «Алматы облысынан Қазақстан Республикасы Парламенті Сенатының шығып қалған депутатының орнына 2022 жылғы 22 сәуірде болған сайлаудың қорытындыларын анықтау және жариялау туралы» қаулы қабылдады.

«Қазақстан Республикасындағы сайлау туралы» Қазақстан Республикасы Конституциялық Заңының 9, 12, 44 және 81-баптарына сәйкес Алматы облысынан Қазақстан Республикасы Парламенті Сенатының шығып қалған депутатының орнына сайлау жөніндегі дауыстарды санау нәтижелері туралы Алматы облыстық сайлау комиссиясы хаттамасының негізінде сайлаудың мынадай қорытындылары белгіленді:

- Гүлмира Асқарқызы Ахметоваға 47 дауыс немесе дауыс беруге қатысқан таңдаушылар дауыстарының 13,58 пайызы берілді;

- Жанболат Әкебайұлы Жөргенбаевқа 294 дауыс немесе дауыс беруге қатысқан таңдаушылар дауыстарының 84,97 пайызы берілді.

Осылайша, Жанболат Әкебайұлы Жөргенбаев Қазақстан Республикасы Парламенті Сенатының депутаты болып сайланды. Сайланған депутаттың өкілеттік мерзімі - 2023 жылғы маусымға дейін (2017 жылғы 28 маусымда сайланған депутаттардың өкілеттік мерзіміне).

«Қазақстан Республикасындағы сайлау туралы» Конституциялық заңның 44-бабына сәйкес Алматы облысынан Қазақстан Республикасы Парламенті Сенатының шығып қалған депутатының орнына 2022 жылғы 22 сәуірде болған сайлаудың қорытындылары туралы ОСК-ның ресми хабарламасы бұқаралық ақпарат құралдарында жарияланатын болады.